La fuelga de guionistes y actores ta moviendo munches coses en Hollywood, y otra que s’amiesta agora a toes eses ye’l pidimientu, de más de cincuenta emplegaos de la plantiya de Marvel Studios, de que se reconoza la so sindicación. Estos son los encargaos d’efeutos especiales, que nun taben hasta agora en nengún sindicatu precisamente porque nun hai nengún que paeza casar cola so profesión, y por eso consideren que, pola mor de les sos funciones, habría reconocelos como miembros de la IATSE (Allianza Internacional d’Emplegaos d’Escenarios Teatrales).
Yá teníemos noticies de les males condiciones d’estos trabayadores, que suelen asomar cuando hai quexes n’Internet polos malos efeutos especiales de dalguna película o serie. Esto asocedió sobremanera apocayá, cola serie de She-Hulk (especialmente col avance), y los emplegaos aprovecharon pa manifestase en contra de lo curtio de los plazos y lo escesivo de les xeres qu’acostacien, lo que los obliga davezu a tener xornaes de siete díes a la selmana.
Asina, agora dicen “valió”, y esixen una reducción na carga de trabayu, plazos más razonables y unes meyores condiciones económiques. Convoquen unes eleiciones sindicales pal ventiún d’agostu y emitieron unos cuantos comunicaos, nos que destaquen lo esceicional de que nun haya sindicación nuna profesión que tien más de mediu sieglu. El presidente d’IATSE (como diximos, el sindicatu al que piden pertenecer) felicitó a los trabayadores y solicitó a Marvel Studios que reconoza la so sindicación yá mesmo como primer pasu pa establecer rellaciones.
Por si queréis más información al respeutive, dexámosvos (calcando equí) la esclusiva del portal Vulture.
