Entama l’añu, siguen les rebaxes de Steam y los más xugones nun faen más que falar de los xuegos polos que más esperen. Nós en Refuelgu! nun somos menos y queremos facer la escoyeta de los videoxuegos polos que más naguamos. No que tola redaición de Refuelgu! coincide ye nuna cosa: El videxuegu más esperáu de toos nun ye otru que “Tiempu de Lleendes”, el primer videoxuegu n’asturianu d’Adrián Carbayales que tien la mitoloxía asturiana y la fantasía como tresfondu. D’esti xuegu yá informemos nun reportaxe fechu n’esclusiva que podéis consultar equí y ver el so gameplay. ¿Qué recomienda la nuesa redaición?
Zelda: Breath of the Wild 2
Aymara González: Zelda: Breath of the Wild 2: Aymara González nagua por xugar al Zelda Breath of the Wild 2, una de les sagues que ye de referencia pa ella desque tien memoria, pero considera que con BOTW superáronse. “Entres dientru del mundu dafechu y, énte’l futuru inciertu que pinta la pandemia, va ser más fácil xugar a BOTW2 que viaxar”.
Vampire: The Masquerade Bloodlines 2
Nicolás Bardio: Bloodlines 2. L’adautación al videoxuegu d’ún de los xuegos de rol más míticos de toos, Vampiru La Mascarada ye la escoyeta de Nicolás. Destaca lo trabayada que ta l’adautación polos gameplays que pudimos ver y la “creación d’esi ambiente llóbrigu de Mundu de Tiniebles”. Amás diz que ta especialmente pendiente de “les adautaciones de xuegos de rol al videoxuegu, como pasare yá con Cyberpunk 2077”
Hogwarts Legacy
Adrián Carbayales: Hogwarts Legacy: Otru xuegu de rol, nesti casu ambientáu nel mundu de Hogwarts. Adrián diz que tien “unes ganes tremendes de poder esplorar Hogwarts y tolos sos secretos de nueves”. Piensa que la cosa va ser como nunca se fixere anque recuerda’l trabayu de Lego que “fizo un gran trabayu al respeutive” pero diz qu'”Una aventura de rol en mundu abiertu xuega n’otra categoría”.
Pokémon Legends Arceus
Blanca Fernández: Lleendes de Pokémon Arceus. Equí la nuesa collaboradora recomiéndanos esti xuegu porque considera que “va ser un cambiu enorme nun Pokémon de mundu abiertu”. N’efeutu, el videoxuegu axunta dos conceutos ganadores en videoxuegos: Pokémon y el mundu abiertu. Fernández di z que “va anovar la forma de xugar la saga.
Elden Ring
Andrés Fernández: Elden Ring. El nuesu redactor más mozu, Andrés Fernández, encamienta’l videoxuegu Elden Ring porque ye un RPG mui prometedor, que desciende de la saga escelente de Dark Souls, nel que collaboró GRR Martin, lo que, a xuiciu d’él “promete un contestu y una hestoria de fondu mui rica, amás d’un mundiu mui interesante”. Elden Ring tien el potencial pa ser un estraordinariu xuegu de mazmorres, que seique pue enllenar el vacíu que dexa l’ausencia indefinida de The Elder Scrolls VI.
Tiempu de Lleendes: Recomendación unánime:
No que tolos y toles redactores de Refuelgu! coinciden ye en señalar que TIEMPU DE LLEENDES, el primer videoxuegu n’asturianu ye la novedá más esperada de los amantes de los videoxuegos n’Asturies. Esti títulu independiente, obra d’Adrián Carbayales, va facenos acompañar a Xandria nuna aventura que tien muncho de rol, bastante d’humor y non poques metareferencies que mos faen pensar nes aventures gráfiques de los 90. Un títulu imprescindible!
