La última película de Marvel, Ant-Man and the Wasp: Quantumania (de la que, por ciertu, podéis ver l’avance n’asturianu calcando equí) estrenóse con muncha fuercia va un par de selmanes, llegando a ser por muncho’l númberu ún nos cines. Por embargu, les crítiques ensañáronse con ella.
Y anque les crítiques nun son tampoco dalgo mui determinante, resulta que los espectadores cayeron estrepitoso la segunda fin de selmana, abaxando hasta un setenta por cientu, lo que ye la segunda mayor cayida nuna película de Marvel en tola historia (dempués de la tamién recién Thor: Love and Thunder). Hai rumores de que se mazca la preocupación nos estudios de la compaña, porque quiciás la fórmula máxica qu’atoparon yunchos pienses que sobreesploten tea dando dellos nicios d’agotamientu. Y ye que, anque la película cabera nun perdió la medaya d’oru, siguióla de cerca la que pue ser la sorpresa del añu, la lloquísima Cocaine Bear d’Elizabeth Banks, y que gociaba d’un presupuestu cuasi seis vegaes menor.
Tres del fracasu de la so última película, una versión nueva de Charlie’s Angels, hubo quien consideró que Banks abaxaba de nivel con esta producción de menor presupuestu y argumentu propiu de serie B, pero, como comentábemos l’otru día (equí), la película escomenzó a facese viral yá primero de la estrena, pos n’Internet llamó muncho l’atención que trate d’un osu drogáu qu’anda pehí asesinando xente.
Per otru llau, n’España sí foi a quita-y el puestu a la película de Marvel Momias, una producción nacional d’animación pa tola familia.
A la contra de lo qu’asocedió en 2021, la película de superhéroes más recaldosa de 2022 foi la cuarta del total, dempués d’Avatar: Tha Way of Water, Top Gun: Maverick y Jurassic World: Dominion. ¿Pueque teamos énte’l principiu de la fin del dominiu del cine de superhéroes? ¿O ye namás ye una profecía que lleva años anunciándose y nunca acaba de pasar?
