Esta selmana estrenábase en Netflix la serie francesa “Lupin”. Pal que nun conoza la historia qu’hai tres d’esti nome, ye importante señalar que “Arsène Lupin” foi un protagonista de noveles d’entamos del sieglu XX, fechu pol escritor Maurice Leblanc. Arsène Lupin ye un “Gentleman cambrioleur”, un caballeru lladrón, o un lladrón de guante blancu si se quier.
Básase na idea del “criminal honráu” con valores, que ta presente n’otres obres televisives como Curro Jiménez, El Zorro. Presenta a un caballeru de monóculu y bona posición económica, que fai robos “de guante blancu” ensin matar o mancar a naide y siempre por causes nobles. Tanto l’autor como l’escritor foron contemporáneos de Conan Doyle y el so Sherlock Holmes, y Leblanc llegó inclusive a escribir una novela na que Lupin s’enfrentaba al conocíu detective londinense.
Lupin na actualidá: Negru y nel París de 2019
Con too, la serie que mos presenta Netflix ye bien estremada. Nun tamos nel sieglu XIX nin a entamos del XX, sinón nel París d’anguaño. El protagonista de la serie ye un inmigrante senegalés que s’inspira nes fazañes d’Arsène Lupin pa idear robos y aiciones criminales nel París de los nuesos díes. Ye una serie interesante tanto dende’l puntu de vista de lo policial y el guión, porque vemos executar a la perfeición robos y depués – como pasa con Sherlock Holmes – muéstrennos lo que nun vimos y desplíquennos los planes ellaboraos pa consiguilo. Dende robar dalgo nel Louvre hasta infiltrase nuna prisión… la serie ye un entretenimientu inteletual y recuerda en muncho a la conocida serie Sherlock, que llevaba el personaxe de Doyle a l’actualidá.
Nesti casu nun ye asina. El personaxe de Leblanc, personaxe ye; y nun dexa de ser una inspiración pal lladrón protagonista de Lupin., D’otra banda, ye interesante ver tamién la trama humana que ta darrera los robos. Una busca de venganza y xusticia d’un fíu que ta convencíu de que so pá nun robó lo que dicen que robó.
