Va unos díes cellebrábase (o reividicábase) el 8 de marzu, el Día Internacional de la Muyer trabayadora, una xornada que tien como oxetivu plantegar les reivindicaciones que mos averen a una sociedá más igualitaria. Los avances son munchos, anque tovía ye muncho lo que queda per delantre. Pero… ¿Hebo dalguna evolución nos videoxuegos? ¿Amenorga o caltiénse’l machismu nos videoxuegos? Ta claro que nun ye una entruga a la que seya fácil responder; pos hai bien de títulos nel mercáu. Sicasí, la impresión xeneral ye positiva.
Pa facer un repasu a los personaxes femeninos más interesantes o conocíos de la historia de los videoxuegos, quiximos facer una clasificación. D’una parte los personaxes secundarios dafechu onde les muyeres tienen un rol de “floreru”. Correspuéndense coles primeres fases de los videoxuegos y los años 80 y 90 anque, como vamos ver, por desgracia tovía siguen quedando. Otru segundu grupu formaríenlu les “muyeres actives pero innecesariamente sexys”. ¿Cuándo una muyer ye “innecesariamente sexy”? Cuando les sos contrapartíes masculines (si les hai) nun tienen esi calter de sexy. Finalmente, el grupu más afayadizu de toos, el de les “muyeres normales” que son, como na realidá, esautamente igual que los homes. Nesti grupu atoparíense les muyeres nes que les sos carauterístiques positives o negatives nun dependen del fechu de ser muyeres.
Les muyeres oxetu: Super Mario y Prince of Persia
Super Mario: ¿Quién nun conoz a Mario ó Super Mario? Esi fontaneru que viste de colorao y entra peles tuberíes comiendo setes y saltando enriba de tortugues tien na saga otros personaxes carauterísticos: Luigi, el so compañeru (Un desarrollu necesariu cuando hai necesidá d’introducir un “Player 2”) y otros como Browser o Wario y Waluigi, los equivalentes malos de Mario y Luigi. Llama l’atención que nesti xuegu xaponés, la única muyer seya la “princesa” Peach. Un personaxe que nun solo ye pasivu (Nun se pue xugar con ella, nun intervién, nun salta, nun come setes y nun estrapalla tortuges) sinón que tamién reproduz tolos clichés de xéneru, pos ye una “princesa”. ¿Cambió daqué Super Mario? Pos la verdá ye que poco. Nel Mario Kart puedes escoyela como personaxe, pero ye nesti y en bien pocos más xuegos de la saga Mario nos que pue tener un rol activu.
Prince of Persia: El Prince of Persia ye ún de los xuegos más míticos qu’hai. Ambiéntase en Persia (L’Iran d’anguaño) nuna dómina ensin especificar y cuenta la historia de cómo rapten a una princesa. El nuesu personaxe ha d’enfrentase a bien d’enemigos y a un poderosu emir (el final boss) pa poder lliberala. El cuentu supónse que ye medieval y por eso reproduz tolos clichés: la “Dama n’apuros” que, xustamente, lo único que fai en tol Prince of Persia ye llorar cuando ta prisionera o abrazar y besar al protagonista si ye a salvala na última pantalla. Nel últimu Prince of Persia nun hai besu nin abrazu, pero sí que sal la princesa a la fin n’actitú compliz… ¡Y ye de 2005! Qué poco avanzamos…
Duke Nukem 3D: El machismu fechu videoxuegu. El videoxuegu Duke Nukem 3D marcó una xeneración. Xunto col Doom foi ún de los shooters más famosos d’aquella dómina (agora yá bien llonxana) na que nun yera preciso emplegar el mur pa poder apuntar. Equí’l machismu nun venía de namás poder xugar al videoxuegu con un home (que tamién), sinón del fechu increyible de que nesa apocalipsis alieníxena onde la vida na tierra desapaeciere, amás del personaxe protagonista los únicos seres vivos que quedaben yeren putes. Pero, quiciabes tovía más llamativo de que foren putes, ye que’l xuegu dexábate da-yos perres pa que t’enseñaren les tetes. ¿Quién da más nel top del machismu?
Ta claro que Duke Nukem 3D ye un xuegu de 1996 y “yera otra época” (por fortuna, pasada). Sicasí, la saga nun s’enmendó y en 2011 siguíen na mesma llinia d’amosar muyeres oxetu. Si dalgún quedó nuna cueva esos 15 años que van ente un xuegu y otru, igual hasta-y gusta.
Grand Theft Auto V: El Grand Theft Auto (Más conocíu por GTA) ye ún de los xuegos más interesantes y guapos. Tien una narrativa maravillosa que mos sorprende con xiros de guión, personaxes con fondura y una montonera de crítiques. Nun ye d’estrañar que’l personaxe qu’interpretemos en cuasi tolos GTA seya un home. Que los homes son mayoritarios nel mundu del crime, qu’hai más criminales y más presos nes cárceles homes que muyeres ye un fechu incontestable y facer lo contrario diba ser acabar con una bona parte del realismu. Sicasí, Rockstar marafundió una ocasión con GTA V pa poder nivelar un poco esto; pos nesa entrega podíase escoyer ente dellos personaxes: Franklin, Trevor y Michael. Un pandilleru, un sicópata y un lladrón de bancos xubiláu. Sicasí, la presencia de les muyeres ye o aneudótica o con roles oxetu: La muyer de Micheal ye la típica “muyer-floreru” y la fía quier ser “actriz porno”. Los demás personaxes femeninos nun tienen demasiada importancia. Nos precedentes, tamién llama l’atención que la única muyer que tien abondo “poder” pa midise colos personaxes criminales homes que sal ye Catalina y tien el comportamientu d’una “histérica”; otra oportunidá que desaprovechó Rockstar de facer un personaxe femenín interesante.
La muyer empoderada que tien que ser ridículamente sexy
Entramos na segunda categoría. Equí los personaxes muyeres tienen iniciativa, faen coses, nun se contenten con ser un oxetu o aplaudir y besar lo que faen otros personaxes homes. Tamos énte muyeres empoderaes pero… ..ridículamente sexy. ¿Qué ye ridículamente sexy? Pa nós ridículamente sexy ye cuando esi atractivu que tien el personaxe femenín nun ta compensáu nel atractivu de los personaxes masculinos.
Tomb Raider: Lara Croft tien resolución, dispara, salta y amás sabe d’historia antigua. Ye un personaxe almirable pero que, indesplicablemente, entra na selva con unos pantalonucos que raspien yá’l ser cinturón y unes tetes esaxeradamente grandes. Eso compleméntase cola “cintura d’aviéspora” que tien y construyimos l’exemplu claru del prototipu de “muyer sexy”. A favor del xuegu, hai que dicir que ye ún de los pocos videoxuegos onde’l personaxe xugable ye femenín.
Red Alert: Tanya ye una soldáu. Pero nun ye una soldáu como tolos demás. Tien dos carauterístiques perimportantes, una bona y una mala. La bona ye que ye la meyor de toos, mata más que naide, a más distancia y tien más vida. Ye la meyor del exércitu. ¿Cuála ye la mala? Que por dalguna razón que se mos escapa (si nun ye machismu) Tanya nun pue poner l’uniforme como cualquier otru soldáu y tien que dir en top. Una muyer empoderada que ye ridículamente sexy. ¿La excusa? Tábemos en 1996.
Videoxuegos bonos con muyeres normales
Dishonored 1 y 2: Dishonored ye un xuegu nel que’l protagonista ye un home, Corvo Attano, un escolta de la emperatriz. Nun ta solo embaxo les ordes d’una muyer, sinón que’l tratamientu que fai’l xuegu de los personaxes femeninos ye normal dafechu. Nel DLC Brigmore Witches el personaxe que xugamos va atopase con muyeres colos mesmos poderes y habilidaes (si nun son mayores). Amás, na segunda entrega de la saga, Dishonored 2, en cuenta d’a Corvo Attano, interpretamos a la fía de la emperatriz, Emily Kaldwin. Nun ye un xuegu mui republicanu pero… ¡Nun se pue tener too!
Medal of Honor: Un videoxuegu de los noventa con una montonera años detrás, un video xuegu de guerra onde’l personaxe ye masculín (presuntamente, porque ye en primer persona); un videoxuegu realista y históricu onde nun se meten muyeres en llugares nos qu’históricamente nun tuvieron… ¿Pue ser feminista? Sí. Si en GTA dicíemos que la proporción de criminales home-muyer inclínase enormemente pal llau de los homes, pasa lo mesmo nel casu de los combatientes na Segunda Guerra Mundial, que ye de lo que va esti xuegu. Nun había muyeres soldáu en primera fila (sí na retaguardia) nos exércitos regulares, pero eso nun-y impide a Medal Of Honor falanos de Manon. Manon ye una resistente francesa, que combate y llucha como una más; que nun ye “innecesariamente sexy” y viste como los demás soldaos. Y too eso en 1999.
Elder Scrolls V: Skyrim: Elder Scrolls foi un títulu que foi avanzando col tiempu. Nel primer Elder Scrolls, el Elder Scrolls Arena de 1994 nun yera posible nin siquiera escoyer un personaxe femenín (y esto nun xuegu de rol, que va d’escoyer personaxes y da-yos forma, ye grave) y tenía una portada que metía mieu na que tolos personaxes homes taben vistíos de mou normal y la muyer taba cuasi desnuda. Sicasí, la saga Elder Scrolls foi de les que meyores evolucionarion y, en cuenta de siguir na cueva, acabó normalizando la igualdá. Tien a favor, ta claro, que’l xuegu ta ambientáu nun mundu imaxinariu; polo que nun ye nin más nin menos realista’l machismu. El casu ye qu’en Elder Scrolls V: Skyrim ye posible interpretar a cualquier personaxe y tener el mesmu tratamientu siendo home o muyer. Si dalgo bono tien Skyrim ye que, no que dura’l xuegu, taremos llibres del machismu que les muyeres tienen que carecer na realidá. Eso sí, siguirá habiendo racismu si nun somos humanos; pos ye parte importante na trama de Skyrim.
Civilization: Civilization ye un xuegu d’estratexa por turnos nel que ser home o muyer nun da más. Sicasí, a la hora d’escoyer una civilización o país col que xugar, podemos escoyer pente una montonera de personaxes históricos. Lo que fai bien equí’l Civilization ye’l poner, xustamente, personaxes históricos femeninos. Cleopatra, Isabel la Católica, Elizabeth of England, Catalina la Grande de Rusia, la reina celta Boadicea… son namás unes de les poques cabezaleres femenines que podemos xugar. Como datu interesante, esti xuegu tien un mod fechu por un usuariu nel que podemos xugar cola Asturies d’Alfonso II o col Llión d’Alfonso IX. ¿Veremos un Civilization VI con un Reinu de Llión gobernáu pola reina Urraca? Seguramente non, pero anda que nun diba prestar…
¿Cuála ye la situación? ¿Cuálos los retos?
Ta claro que’l mundu de los videoxuegos ta avanzando pasu ente pasu. El númberu de videoxuegos feministes nos que la igualdá de los homes y les muyeres ye un fechu nun fai más que medrar. Sicasí, tamién ye verdá que dellos “ticks” sexistes niéguense a desapaecer dafechu. Ún de los retos más grandes qu’hai a la hora d’algamar la igualdá (home-muyer; racial, etc…) ye’l de facer por que los grupos históricamente oprimíos tean más presentes nos videoxuegos ensin facer que’l realismu desapaeza. Tamos seguros de que mui poques persones quieren ver un caballeru d’orixe chinu na edá media europea, una lady británica nun Gentlemen Club en 1870 o una muyer negra lluchando en primera llinia en Normandía. Pero hai milenta maneres de facer que los xuegos seyan más inclusivos ensin sacrificar el realismu. Na Segunda Guerra Mundial hebo munches muyeres que llucharon na Resistencia francesa y munches otres, regulares, nel Exércitu Bermeyu; na Guerra d’Irak nun hai homes namás, hebo siempre crime femenín – anque seya minoritariu – tamién hebo muyeres pirates que mandaron barcos de vela y, de xuru, dalguna garraría les armes na Revolución Americana. Hai abondos personaxes históricos d’importancia colos que facer videoxuegos realistes, namás hai que saber ponese a buscalos y; por fortuna, la ficción ye bien grande pa que pueda caber nella too.
