Nun ye raro, sabémoslo bien, que dacuando echen la culpa a los videoxuegos y a los xuegos de rol cuando nun alcuentren una razón cola que comprender dellos delitos. “L’asesín de la katana” y “el crime del rol” son probablemente los casos más nomaos n’España, que quedaron nel imaxinariu coleutivu anque tienen yá cuasi trenta años. La cosa aseló bastante dende entós, eso ye verdá, sobre manera nos telediarios y tertulies (probablemente non solo porque les nueves formes de diversión se foren xeneralizando, sinón tamién poles perres que dexen les grandes productores de videoxuegos nes canales de televisión pa los anuncios de navidaes), pero de toles maneres nun ye raro que tovía nos lleguen ecos d’aquella idea. Esto, al empar retrotráinos a lo que pasó nos años cincuenta colos cómics, cuando metá la caza bruxes comunistes se llegó a la quema d’obres por mor de les teoríes del siquiatra Fredric Wertham. Tanto naquella como anguaño ye fácil alcontrar rellación d’una obra col mozu criminal, porque estos, como ye normal, suel consumir productos d’entretenimientu.
Y asina, como dicimos, paez que los videoxuegos siguen siendo un recursu del que tirar cuando nun s’alcuentren o nun se quieren alcontrar otres causes pa un delitu, y nesta ocasión ye’l presidente de Francia, Emmanuel Macron, el que lo fai. Esti, pa esplicar los disturbios asocedíos nel so país nestos postreros díes, diz nunes declaraciones que los mozos “reproducen na cai colo que los intoxicaron los videoxuegos”, como si estos distorsionaren la so visión de la realidá y agora pensaren que nun tán corriendo peles cais, quemando coses y saquiando tiendes, sinón, a cencielles, xugando a un shooter, un Grand Theft Auto o dalgo de pol estilu.
La verdá qu’esto da una dimensión nueva a la culpabilidá de les obres, porque yá nun s’indica a elles namás como causa de qu’un alloriáu, o quiciabes un grupín d’amigos retorcíos, faigan dalgo terrible. Ye que se ta diciendo que miles de persones (si contamos namás tolos deteníos) actúen como por una especie d’histeria coleutiva de calter violentu a causa de l’alteración de la realidá que provoca xugar a videoxuegos.
Y, d’esta manera, sigue perpetuándose’l sambenitu.
