a industria del videoxuegu n’España ta espoxigando, y cada vez nos ufre más xuegos bien variaos y de distintes temátiques y van algamando más y más públicu. Ente toos estos xuegos nuevos que se tán asoleyando nun podemos dexar de falar de Magic Twins, que ta acabante salir nel mes de marzu y que tien pinta que va dar pa falar muncho.
Magic Twins ye un videoxuegu arcade de puzzle, nel que tienes mou de xuegu cooperativu (onde tienes que collaborar colos tos collacios pa dir pasando los niveles), pero col que tamién pues xugar tu solu. Los so creadores son Flying Beast Labs, un estudiu indie asitiáu en Madrid, definen el so productu como una mezcla ente Puzzle Bobble, Plants vs Zombies y Overcoocked, y nun s’enquivoquen.
Pa resumir un pocoñín la historia, que ye perentrenía, ta protagonizáu por Abra y Cadabra, dos hermanes que son bruxes y qu’estudien na Escuela de Bruxería de Mallorca (isla na qu’asocede la historia) y que desobedecen la primer norma d’ella que ye “Non usar los poderes cromáticos pa tiñir la ropa”. Al desafiar esta norma y tentar de facelo causen el Colormageddon y abren fiendes a otres dimensiones que faen qu’entren na islla elementales de tolos colores. Cola gabita del so calderu máxicu van tener que resolver esti enguedeyu y que la islla vuelva a la normalidá.
Al traviés d’esta historia vas pasando delles pruebes y niveles na islla, que te permiten dir desbloquiando zones nueves y desafíos y oxetivos secundarios al empar que sube’l nivel de dificultá y de les pruebes. Amás, estes pruebes son bastante variaes.
Una mecánica amañosa
El xuegu entama cuntándote lo que faen y con un tutorial pa que depriendas a xugar y t’afayes cola mecánica del xuegu, na que los más básico ye que tienes que llanzar fechizos básicos a los enemigos, que son de distintos colores, y dir garrando los tintes que suelten pa llanzar fechizos más poderosos de distintes combinaciones de colores. Delles vegaes van pidite que garres los tintes nún orde, otres que destruyas una mena o otra d’enemigos y otres más que faigas distintos tipos de fechizos, a veces a contrarreló o con un máximu de fechizos especiales. Amás, pues cambiar d’un llau o otru la pantalla y xugar coles dos hermanes cuando tas xugando solu. A midía que vas superando too esto vas algamando tamién llogros y traxes alternativos pa les protagonistes.
El xuegu tien una estética de personaxes d’estética kawaii y tamién una estética venceyada a Halloween (nun podemos escaecer que les protagonistes son bruxes nuna Escuela de Bruxería)
Amás, esti xuegu podéis xugalu en trés llingües: castellán, inglés y gallegu. El fechu de que tea en gallegu amuesa’l compromisu d’esta compañía coles llingües cooficiales y contribúi a la normalización d’esta, polo qu’hai que los felicitar pol trabayu que ficieron pa dar la opción a los xugadores de poder xugalu non en una, sinón en dos llingües peninsulares amás de n’inglés.
El xuegu ta disponible pa ordenador (podéis atopalu na plataforma Steam) y pa Nintendo Switch, y pue xugase tanto con tecláu como con mandu.
Poco más me queda que contavos del xuegu, anímovos a probalu.
