Amunchayá que Planeta espubliza manga en catalán, como son exemplos Bola de Drac, Detectiu Conan o My Hero Academy. Y ye qu’hai que recordar que ye la primer llingua d’Europa con más falantes que nun ye oficial na Xunión. La finada Glénat tenía tamién un gran catálogu nesta mesma llingua, anque por desgracia yá dexó d’esistir. Por embargu, a lo llargo de 2022 tenemos visto avances que muestren un gran progresu al respeutive de la inclusión nel manga d’otres llingües del país.
Per un llau, la mesma Planeta anuncia que pa 2023 va asoleyarles populares Ranma 1/2, One Piece y Haikyu. Per otru, Norma Editorial anunció y estrenó antaño una potente llinia, tamién en catalán, con series tan como Tokyo Revengers, Chainsaw Man y Guardians de la nit, arriendes de prometer la llegada d’otres nueves pa 2023. Y per otru más, la billingüe Ooso, que saca toles series en castellanu y catalán dende la so fundación, escomenzó esti 2022 a espublizar tamién n’euskera cola serie de manga científicu X-Venture, asoleyándola nos trés idiomes al empar.
Si estes publicaciones siguen teniendo ésitu, siguiendo a esti ritmu, queda’l gallegu, nel que pelo menos de momentu la traducción ye dalgo cuasi testimonial… y, por supuestu, darréu toca al asturianu, ¿non? A ti, ¿qué serie te prestaría más ver traducida a la to llingua? Nun ta mal suañar con ello, pero lo meyor de too ye qu’anguaño paez que tamos más cerca de velo que nunca.
