Anguaño llévase muncho, en TikTok y blogues de toa mena, facer guíes de llectura pa facilitar adientrase nes hestorietes de dalgún personaxe, davezu’l que tea de moda porque salió nuna película acabante d’estrenar. Paez lóxico necesitar daquién que te diga per ónde empezar a lleer, porque si vas a una llibrería lo más seguro ye qu’atopes una montonera cómics del personaxe en custión, hasta pue ser que dellos distintos tengan puesto “númeru ún” na portada. Por embargu, has saber una cosa, has tenela bien clara, y ye qu’esa persona que sabe tanto, y que fala en vidéu con estanteríes acorrompinaes de cómics en fondu, nunca nun siguió una guía como la que ta faciendo. Y nun ye que cuando escomenzó a lleer nun ficiera falta por ser too más cenciello, porque hai personaxes que tienen más d’ochenta años; los más anden pelos sesenta. Cuando esa persona compró’l primeru nun había guíes (probablemente nun había nin Internet) porque daveres que nun precises guía dala y, pa mio idea, faen abondo más mal que bien. Convierten la llectura del cómic de superhéroes, que cuasi siempre habría ser un entretenimientu llixeru, en daqué misterioso, enguedeyao, cuasi arcano, y pa lo que non tol mundu ta preparáu.
Los universos comiqueros de Marvel y DC son cuasi infinitos; nunca, por más que t’esfuercies, nun vas ser a lleelo too. Nun hai un cabu pel qu’entamar de lleer y otru pel que terminar. Nun tán pensaos pa eso, nun son como les series de televisión con primer, segunda y tercer temporada qu’has ver necesariamente nesi orde. Una de les gracies, una de les coses a las que-yos garres el gustu y poles que nunca nun pierdes el vezu de lleer, ye qu’arriendes de lleer una hestoria particular tas somorguiándote nun mundu inmensu del que namás contemples un cachín, magar qu’acolumbres coses maraviyoses qu’asomen en finxu’l cielu. Llueu yes tu, y solo tu, quien decide qué camín has siguir, qué tierra desconocida esplorar. Quiciabes llees un cómic d’un personaxe onde sal otru que te llama, y quies saber más d’él. Igual menten un fechu pasáu, como lo fadríen nuna película o una novela, cola diferencia de que nesta, si quies, pues enterate de qué ye exautamente lo qu’ocurrió. Pueque namás t’apeteza saber qué pasa darréu, porque si hai daqué no que suelen ser bonos los cómics de superhéroes ye, de xuru, en dexate bocabiertu cola páxina final.
La meyor guía de llectura, la que daveres te fai entrar ensin remediu nel mundu’l cómic mainstream americanu, ye pela qu’entraron toos esos gurús, y non el siguir los conseyos que dan p’acollechar siguidores:
- De mano, ve pa una llibrería, a la seición de cómics. Suelen tar colocaos según personaxe, y si non siempre pues entrugar a quien tea a cargu.
- Echa una güeyada, a ver cuálu te llama más. Les portaes tán pa eso, rediós. Nin ye menester que traya “númberu ún”, si ye lo que te peta pues xubir col tren en marcha.
- Cómpralu y lleelu. Si nun tienes perres pues facer lo mesmo na biblioteca, ye lo que facía yo de guaḥe colos tomos más gordos.
- Si faes esto una vegada y nun te presta, ye dable que tuvieres mala suerte. Si lo faes delles y nun acaba prestate… pos oyi, nun pasa nada, como si nun hubiera otres aficiones. Pero si te prestó… bu, entós prepárate pa entrar nun mundu que te va llevar tola vida esplorar, y nunca nun vas descubrir dafechu. Y, en pasando munchos años, relleerás les hestorietes que comprasti agora, y el güeyu avezáu verá coses de les que nun te decatares: que’l dibuxante tenía influyencia d’esi otru, que’l guionista facía referencia a aquella hestoria del añu la pera qu’a él-y prestó siendo ñeñu, o que la razón de qu’a esi personaxe-y caya mal l’otru ye qu’amunchayá tenía una moza que lu dexó por él.
