Como yá vos tenemos contao (por casu, equí), Marvel vien arrastrando un fenómenu dende va tiempu, y ye la identificación de la ultraderecha con un de los personaxes más despiadaos de la compaña. Y ye que Frank Castle ye un antihéroe bien popular al estilu de Charles Bronson, veteranu de Vietnam (bono, pola mor del tiempu esñidiosu de Marvel, agora d’Afganistán) y que se dedica a frayar a tiros a los criminales dende que la familia-y morrió al vese metíos nun tirotéu ente mafies enemigues.
El personaxe nació nos setenta, de fechu, más bien como un villanu al que se podía comprender que como un antihéroe, pero metá la guerra de Reagan contra les drogues tornóse de lo más popular. Cuando los soldaos d’Afganistán escomenzaron a dibuxase’l logo en chilecu la cosa empezó a díse-y de les manes a Marvel, y cuando se volvió un símbolu de Blue Lives Matter (el retruque a Black Lives Matter que calca na muerte de policíes) la cosa quedó dafechu descontrolada.
Marvel tien fecho de too pa safase d’esti venceyu: enfrentalu a nazis, cambia-y el logo por otru y les armes de fueu por espaes al convertilu en cabezaleru de La Mano, volvelu Dios de la Guerra… pero, chachu, nun hai manera. Y agora, paez qu’énte’l desesperu, deciden acabar con Punisher mesmu d’una manera que pelo menos ye bien llamadera. Y ye qu’acaben de resucita-y a la muyer, y nel númberu docenu de la serie nueva (nun sigas lleendo si nun quies spoilers), esta, ablucada y deceicionada colo que tien fecho’l maríu nel so nome, píde-y el divorciu, garra los pisos francos del xusticieru y toles armes que tien y viéndelo too pa quedar cola metá de les perres.
Darréu, el personaxe paez suicidase delantre de dellos superhéroes (de fechu, tres la muerte aparente, Doctor Strange diz que Castle nun ye yá parte del universu) pero en verdá acaba n’otra dimensión na que s’alcuentren metá d’una guerra civil. Ellí decide salvar a unos neños, y la hestoria acaba con él pidiendo que lu llamen Frank. Asina, paez que la so vida como xusticieru acaba pa siempre, anque claro, en Marvel nunca nun se sabe.
Y, eso sí, tamién dexen una puerta abierta a un Punisher nuevu bastante menos xustificable, pos La Mano búsca-y un sustitutu nun neñu sicópata, encarceláu por matar al pá y la ma y atacar a los policíes que lu arrestaron. Si esti se convierte nel nuevu Punisher, ta claro que ye una táctica más pa ver si consiguen que la ultraderecha abandone’l logo… Lo más seguro, q’otru intent falliu.
