Como yá vos tenemos contao, Magic ta espandiéndose pelos distintos universos de ficción, y failo a lo grande como cuando sacó, pa El Señor de los Aniellos, la que yá se convirtió la carta más cara de la historia, una del Aniellu Únicu con brillos doraos y escrita n’élficu de la que namás esiste un exemplar, y que’l raperu Post Malone compró al agraciáu al que-y tocó por dos millones de dólares. Tamién tienen salío cartes de Transformers, de Warhammer 40,000, tán a puntu de salir de Doctor Who, Jurassic World o Fallout… Ye evidente que les posibilidaes son infinites, nun hai videoxuegu, serie o saga de películes de xéneru que nun seya susceptible a cayer baxo los sos raxos.
Sicasí, ye posible que nun haya universu dalu con tantes posibilidaes como’l qu’anuncien agora, pola so popularidá pero, sobre manera, pol so grandor. Esti ye l’Universu Marvel, que yá solo como cartes de creatures podríen usar miles de personaxes de los más d’ochenta años nos que se tien forxao.
Por embargu, va haber qu’esperar. Son munchos los anuncios que ta faciendo Magic tocántenes a los universos de ficción qu’adapta al xuegu, y paez que caún va quedando más lloñe que l’anterior. Nun ye hasta 2025 que vamos poder xugar a esta estraña collaboración ente les dos grandes compañes, anque tamién ye verdá que, polo que cuenten, lleven años trabayando pa que se faga posible. Tamién, poles declaraciones de Cynthia Williams (presidenta de Wizards of the COast y la so propietaria, Hasbro) podemos esperar grandes salíes, por tienen la intención de sacar lo que llamen “sets principales” al estilu de los d’El Señor de los Aniellos, mientres que pa otros universos queden en mazos centraos en comandantes..
Dexámosvos equí l’avance perépicu col que Wizards of the Coast anuncia esta collaboración, y esperamos pacientemente a que llegue’l día de la estrena.
