L’actual etapa de Spider-Man, con Zeb Wells como guionista, ta produciendo unos cuantos disgustos a los llectores. Empezó, de mano, casando a Mary Jane con otru puntu, col que pa detrás agora tien dos fíos, lo qu’alloña más tovía la posibilidá de desfacer el llamáu “mefistazu”, o lo que ye lo mesmo, el xiru argumental sacáu de la manga na primer década del sieglu pa que Peter y Mary Jane dexaren de tar casaos (Peter facía un tratu con Mephisto, el Diañu de Marvel, pa que salvara la vida a so tía).
Y anque la etapa anterior, la de Nick Spencer, foi tamién mui criticada poles coses que se-y ocurría facer nella, esta pelo menos volviera a axuntar la pareya, cosa polo que munchos lu perdonaron. Pero agora que Wells vuelve a separalos, y pa facer coses non menos rares, el xentíu lleva un tiempu pidiendo la so cabeza.
Esto va a muncho más agora, porque traen por sorpresa, pero compartiendo a noticia en redes pa que tol mundu s’entere y compre’l cómic, una noticia que presta a mui pocos; nel númberu más recién de la serie (el #26 del volume nuevu, y qu’anunciaben como’l más ablucante de los últimos cincuenta años del héroe arácnidu), mátennos ún de los personaxes más populares de los creaos nesti sieglu pa la compaña. Tanto que-y acaben de dar una serie de televisión propia. Referímonos a Kamala Khan, la nueva Ms. Marvel, personaxe creáu en 2013 y que pa munchos yera precisamente, como superheroína adolescente con problemes d’adolescente, una socesora de Peter Parker.
Por supuestu, yá anuncien tamién un cómic especial sobre ello, Fallen Friend: The Death of Ms. Marvel, y ye de suponer que van facer bastante ruíu hasta que, mui probablemente, faigan otru eventu o serie nueva que la resucite. Por embargu, que la muerte d’un personaxe tan queríu se produza nuna serie ayena, d’esa manera y cola fama que tenía yá’l guionista, arriendes del gran error d’apregonalo nes redes pa vender más a costa d’a que naide nun-y pille por sorpresa, tien a los marvelómanos fechos unos basiliscos.
