El rellanzamientu de Blade, el cazavampiros más famosu de Marvel, y que yá interpretó Wesley Snipes nuna triloxía de películes, paez condergáu a nun salir p’alantre. L’añu pasáu suspendióse al salir Bassam Tariq de la direición, según dixeron porque taben faciendo demasiaos cambios na producción y el calendariu. La cosa paeció avanzar cuando lu sustituyeron pr Yann Demange (White Boy Rick) como direutor, pero, según informa The Hollywood Reporter (pues ver la noticia calcando equí) vuelve a suspendese hasta avisu nuevu pola mor de la fuelga de guionistes que ta faciendo temblar California.
Asina, la versión de Blade protagonizada por Mahershala Ali ye’l primer productu de la compaña en quedar xeláu, pero nun tien por qué ser l’únicu. Y ye que, metá tol megollu de la Fase 5 del Universu Cinematográficu Marvel, tamién tán trabayando al empar que nesta en Captain America: New World Order, Thunderbolts, Deadpool 3 y la pondera de Wandavision y que protagoniza la bruxa apaecida nesta, Agatha: Coven of Chaos. De la mesma manera, la fuelga podría afeutar tamién a la versión nueva de Fantastic Four, pos tán na fase d’escoyer el repartu. Por nun dicir que nun van querer apeguñar muncho les estrenes, y cada retrasu pue emburriar más p’alantre toles demás salíes.
Ye evidente que’l calendariu de la Fase 5 va sufrir unes cuantes modificaciones, pero queda por ver cuánto dura la fuelga y asta ónde van llegar les consecuencies.
