Como vos contemos va non muncho (equí), Disney ta aprovechando la sinerxa de les munches compañes que tien comprao a lo llargo de los años, y una de les maneres ye dir atropando los drechos que tenía esperdigaos pa facer adaptaciones a cómics de les qu’agora son les sos propiedaes intelectuales y acutalos pa Marvel (que tamién ye d’ellos). Ye por esto que va unos meses crearon el sellu 20th Century Fox, nel que de momentu editen trés franquicies d’esta productora: Alien, Predator y Planet of the Apes. D’esta última, por embargu, solo editaron hasta agora una serie curtia que casa coles películes nueves, cosa que nun gustó demasiao a los fans de la saga orixinal (y con esto queremos dicir les películes de Charlton Heston). Yá que nos años setenta Marvel espublizaba cómics d’esta continuidá, munchos pensaben qu’esto sedría lo que fadríen tamién agora.
Bono, pos por suerte solucionar esi descontentu tenía solución fácil. Con una nueva serie curtia, Beware the Planet of the Apes, Marvel trai de nueves l’universu de la película de 1968 con una precuela inmediata na que vamos tener cuasi tolos personaxes de la primer película (Doctor Zaius, Cornelius, Zira y Nova), por supuestu sacante’l propiu astronauta George Taylor, que nesa ta de camín al futuru. El guionista Marc Guggenheim (más conocíu por facer series de televisión como Arrow) y el dibuxante español Álvaro López (Captain Marvel, Ka-Zar: Lord of the Savage Land) prometen trayenos, amás, non solo l’ambientación, sinón tamién l’estilu de les películes, a la que sobre manera Guggenheim-y tien munchu ciñu. Una saga “enllena de misteriu, personaxes embruxiladores y delles sorpreses daveres estravagantes”. Tamién, amiesten, van incorporar a la hestoria dalgunos elementos de los cómics de los setenta de los que falábemos un poco más enriba, y que de xuru que van prestar a los más friquis.
