Va tiempu que Marvel ta faciéndose con franquicies potentes, davezu al tiempu que la compaña propietaria, Disney, faise con otres propiedaes intelectuales. Dalgo dempués de facese con Lucasarts, Marvel escomenzó a espublizar los cómics de Star Wars, saga de la que perdiera los drechos en 1987. Va poco que, pola mor de la compra de Fox, principió coles series d’Alien y Predator, qu’hasta va nada tamién asoleyaba la editorial Dark Horse. Agora llega a Marvel otra saga nomada nel mundu enteru, y esta ye la d’El planeta de los simios.
Masque Marvel tenía espublizao cómics de la saga nos años setenta (basaos nes películes, non na novela orixinal), tamién perdiera los drechos y estos tienen pasao por unes cuantes editoriales, siendo la última BOOM! Studios, que llegó a sacar delles series de The Planet of the Apes y, en collaboración con otres editoriales, hasta crossovers con Star Trek, Tarzan, Green Lantern o King Kong.
Agora, Marvel prepara p’abril de 2023 una serie abierta guionizada por David F. Walker (Naomi) y dibuxada por Dave Wachter (Teenage Mutant Ninja Turtles, Godzilla in Hell), anque la portada del primer númberu ta a cargu del valencianu Salvador Larroca.
Y como ye vezu cola entrada d’una gran franquicia na familia Marvel, la editorial celébralo con una riestra de portaes alternatives nes que los personaxes de siempre “dan la bienllegada” a los nuevos. ¿Cuánto vamos tardar en velos dase de mocazos nes páxines interiores? Probablemente non muncho, pero de momentu quedamos con esto.
Darréu, dexámosvos cola portada del primer númberu de la serie y les alternatives nes que los simios s’atopen con superhéroes como Hulk, Scarlet Witch, Wolverine o Howard the Duck.
