Vamos contándovos qué series y películes van cayendo pola mor de la fuelga de guionistes y actores, que tien provocao un estrozu enorme en Hollywood. Por casu, la serie que diba ser remake de Metropolis, el clásicu alemán de ficción especulativa, y tamién la tercer parte del clásicu Tron, pasaron yá a meyor vida, pos tán cancelaes de manera indefinida y con mui poques posibilidaes de que se vuelvan a retomar los proyeutos.
Agora, Warner Bros. anuncia dellos retrasos importantes, anque al poner feches nueves pa ellos ta suponiendo que la fuelga va acabar pronto, dalgo que tovía nun ta nada claro. La primera d’estes ye Dune: Part Two, continuación de la recién y esitosa adautación de la obra de Frank Herbert. Teníen pensao estrenala’l trés de payares d’esti añu, y agora pasa al quince de marzu del viniente. Tando nun procesu tan avanzáu, ye probable que namás-yos quede regrabar diálogos (cosa que ye vezu en Hollywood, que los actores repitan los diálogos en cabina), pero afitar esa fecha nueva va venceyao a suponer que pa entós yá va tar too arreglao y van tener tiempu a ello. Otra película atrasada ye Godzilla x Kong: The New Empire, la entrega nueva del “monsterversu” y na que los dos bichos van tener qu’unise contra una amenaza mayor qu’ellos. Esta tien un cambiu de fecha mui pequeñu, que ye del quince de marzu de 2024 al doce d’abril.
Sicasí, la obra na que los planes s’alterien de manera tremenda ye la película d’animación basada na obra de Tolkien y que ta en manes del direutor d’anime Kamiyama Kenji: Lord of the Rings: The War of Rohirrim. Esta taba pensada pal doce d’abril de 2024, y agora pasa nada menos que pal trece d’avientu.
Y asina, la fuelga sigue faciendo estragos ente les películes norteamericanes, y ye probable que dientro poco alcontremos un vacíu bultable nos cines. ¿Podrán aprovechalu producciones d’otros países pa facese un güequín nes sales?
