La serie de dibuxos de He-Man pillóme siendo mui ñeñu, cuasi nun tengo alcordances d’ella. Sí, por embargu, d’unos cuantos moñequinos que debalaron per casa unos cuantos años. Y ye que les grandes series de dibuxos de los ochenta teníen trampa, porque les más d’elles yeren en verdá un anunciu de venti minutos que tragábemos ensin rechistar masque metieren otros tantos pel mediu. El maxín derrubiaba en tolo tocante a diseños de personaxes, armes, montures, vehículos y castiellos, metiéndonoslos pel focicu pa que tuviéremos claro qué pidir pa navidaes. Tocántenes a la calidá de l’animación y de los guiones yá andaben más floxos, nun vamos engañanos, pero col envís de vender xuguetes crearon mundos fantásticos d’héroes y monstruos qu’entemecíen maxa y teunoloxía ensin decoru dalu. Mundos que pehí quedaron, tiraos, esperando a que daquién apuerte pa revilvalos.
Eso ye lo que fizo’l guionista y direutor Kevin Smith pa la vuelta de los Masters en manes de Netflix, una serie que sigue allá onde quedara la orixinal va yá trenta y seis años. Non ensin polémica, eso ye verdá, y ye que, si tovía nun vos decatastis, He-Man nun apaez en títulu la serie. Smith dexa un poco de llau al héroe indiscutible pa centrase n’otros personaxes… y claro, d’ehí surde la polémica de siempre, yá podéis maxinar: que si “axenda política” y coses d’esa mena. Yá vos digo que la cosa nun va d’eso, sinón d’esplotar les posibilidaes cuasi infinites d’un mundu tan ricu y diversu.
Pa ello nun fai prisioneros, nun tien mieu a dar xiros de guión que te dexen xeláu (davezu n’últimu segundu l’episodiu) y colos que va per caminos pelos que resultaría bien complicao tornar pa que les coses vuelvan a allugase nel so sitiu de siempre. Encantaríame dicivos cuálos, pero nun hai manera de facelo ensin chafavos tola esperiencia. A diferencia de la serie orixinal, que de capítulu a capítulu caltenía’l status quo, equí entámase una cada vez más gorda y onde solo dacuando arreciendes pa ú van dir nel siguiente. Y el recursu aquel qu’había, de presentar personaxes nuevos o cambiar los diseños de los esistentes como sida pa vender moñecos nuevos, conviértese asina en tou un acontecimientu que nagües pa que llegue, porque de xuru que va xuncíu a una evolución tremenda de trames y personaxes.
Si vos digo la verdá, la primer temporada prestóme, pero nun m’embruxiló. Foi agora, cola segunda (son temporaes curtines, bien podríen ser películes) cuando me decato de que’l plan de Smith ye a plazu llargu, y que tien guardaes sorpreses por demás que va fervicando y sacando del sombreru pasu ente pasu. Daveres que los que lu critiquen, defendiendo una serie vieya que, sacante la señardá, yera llamentable a nivel argumental y téunicu, tiénenlo bien fácil: que vean la serie clásica sin son a ello. Yo, mentanto, naguo por contemplar qué nos espera l’añu qu’entra.
