ATENCIÓN, DESATAPAMIENTOS:

Matrix Resurrections ye la cuarta entrega de la secuela “Matrix”, la película que cambió’l cine en 1999 y que seya, probablemente, ún de los clásicos más importantes de les últimes décades. Matrix planteagaba la revolución de les máquines escontra los humanos, la distyuntiva ente’l mundu real (desfechu) y el irreal (matrix), y munches entrugues de calter filosóficu que mos facíen pensar nel Mitu de la Caverna de Platón pero tamién en si queremos más ser inorantes y felices o sabios y infelices. Los que somos fans de Matrix nun lo somos polos efeutos especiales, el tiempu-bala o la estética (que tamién tan bien, hai que lo dicir), sinón, xustamente, por toa esa manera d’afondar en bien d’entrugues que-y esmolecen a la Humanidá y que dexen una cierta incomodidá al plantegase. Matrix Resurrections, como Matrix la de 1999, tien esi plantegar l’alderique constante que fai qu’a ún-y dean ganes de da-y al stop (desgraciadamente imposible nun cine) y ponese a falar de los temes que presenten.

File:The Matrix Resurrections.jpg

Mientres que la 2 y la 3 nun afondaron en gran midida nes cuestiones filosófiques que planteagaba la primera, y llimitábense a desendolcar la trama de cómo Neo y Trinity yeren a salvar el mundu de los humanos; en Matrix Resurrections (Matrix 4 pa entendenos) hai un xiru de tuerca y un afondar nos plantegamientos. Mientres qu’en Matrix víemos cómo Neo ecoyía la pastiella colorada, en Matrix 4 vemos cómo ye la vida del “escoyíu” d’optar pola azul. Eso sí, años depués de los socesos de matrix. D’esti mou, mientres qu’en Matrix de 1999 la pastiella colorada plantega una “lliberación” y una llucha coleutiva (escontra les máquines), na Matrix de 2021 la pastiella colorada da-y por completu la vuelta a esa “lliberación” qu’acaba siendo una “carga” pa Neo: Unos diaños que lu persiguen en suaños, unos reflexos d’una realidá que lu atormenten y que lu faen sentir como si tuviere llocu. Ye interesante cómo se plantega como un fracasu individual (llocura) lo que na otra yera un éxitu coleutivu (lliberación). Y pa detrás, Lana Wachowski failo con una bona dósis d’autocrítica: por exemplu, critica’l conceutu binariu de la escoyeta colorada/azul qu’emplegó nes entregues anteriores, defendiendo la posibilidá de terceres víes y de que’l mundu nun ye blancu o prietu.

Munches entrugues pa pensar

Amás, Wachowski plantega más coses. Nesta nueva entrega fai de Neo un desendolcador de Videoxuegos, y fixo de los socesos de Matrix de 1999 un videoxuegu. Una manera de “banalizalo” como se diz na película y, en cierta manera, nun podemos dexar en si nun ye acasu lo qu’asocede con bien de lluches polítiques d’alta significación qu’acaben convirtiéndose en modes. Pero tamién un exemplu más de cómo los “diaños” qu’atormenten al artista acaben buscando la salida pela vía del arte (el videoxuegu nesti casu).

Otru momentu importante de la película ye una sesión de “brainstorming” de los miembros de la compañía de videoxuegos na que desendolca’l xuegu Neo. Equí faise una meta-referencia a les propies hestories de Matrix y fálase de qué ye lo que quier ver l’espectador nun remake d’una película. Hai quien quixo ver una diseición de lo que ye Matrix (el productu) y los estremaos ellementos que lu integren (filosofía, efeutos especiales, tiempu-bala…etc), y tamién hebo quien quixo ver ehí una crítica a les secueles de marvel y demás que paecen enllenar la totalidá de les novedaes y sueprproducciones cinematográfiques.

Black Mirror y Battlestar Galactica nel retrovisor

Depués, en lliberando a Neo, podemos ver que’l tiempu pasó pal restu d’humanos que taben nel mundu real. D’esti mou, al volver a la ciudá humana baxo la tierra, vemos delles coses: D’una banda, que la guerra yá nun ye ente humanos y máquines (lo que vendría a ser una guerra ente especies) sinón ente suxetos que piensen d’una manera y otros que piensen d’otra (ideolóxica). Amás, la sociedá ye “multicultural” nel sentíu de que la convivencia produzse ente humanos, máquines (que se sumaron a la causa) y programes d’ordenador qu’alquirieron una forma corpórea gracies a la ciencia. Plantégase asina, como fixeron series como Battlestar Galactica, el llibre albedríu de les máquines y de los programes d’ordenador y cómo esi llibre albedríu afeutaría a les sos decisiones. Tamos equí ente una sociedá menos dicotómica (L’ataque a la dicotomía de lo azul/colorao paez ser una constante) y una reflexón – anque mui de pasu – sobre los derechos de les máquines, l’aceutación de les sos conciencies como dalgo más a tener en cuenta nuna sociedá.

Otra de les coses, quiciabes la menos bien desendolcada, ye la vida del Axente Smith que quier independizase de “L’Analista”, un personaxe que crea la versión de Matrix actual na que ta Neo y que recuerda nes sos funciones al arquiteutu de la primer entrega. Son el mesmu programa? QUé foi del otru? Y, sobre manera, si Smith quier lliberase d’él por qué depués ataca a Neo? Hai bien d’interrogantes abiertos. Otra manera, nótase tamién la buelga de Black Mirror en coses como nel fechu de que se diga que Neo y Trinity nun pueden pela so cuenta cambiar les coses pero qu’en “toles simluaciones” yeren a baltar el sistema si cooperaben xuntos. Esto fainos pensar nel capítulu de Black Mirror de l’app d’alcuentros.

En xeneral, tamos ente una película que supera les espectatives. Quiciabes porque teamos mui avezaos a les producciones que nun aporten nada más que lo esperable, equí atopamos los ingredientes qu’esperamos (metafísica, reflexón, tiempu-bala, armes, estilismu cyberpunk…) y un desendolcu distintu. Como si garráremos la fariña, los güevos y el sal y en cuenta d’un pastel tuviéremos faciendo una empanada. ¡Igual de rico!

Leave a Reply

La to direición de corréu nun va espublizase. Los campos riquíos márquense con *