La canal de streaming HBO Max va pasar a llamase, a cencielles, Max, nun pasu más d’anovamientu que se dirixe a convertilu nuna canal de toa Warner (la propietaria d’HBO) que seya capaz de competir con Netflix o Disney + con toles armes posibles. Y anque tovía van tardar un poco en llegar a España’l nome y los planes de soscripción nuevos (paez ser que pa 2024), sí podemos falar d’una riestra d’anuncios que vien xuncida al rebautizu.
Ún, el que más espectación ta creando y, como vos comentábemos l’otru día (equí) yá se ruxía, ye una adautación nueva de la saga de Harry Potter, nesti casu en formatu de serie y con siete temporaes planiaes (una pa cada llibru) que van permitir esplayase na hestoria pa que seya más fiel a los llibros que les películes. P’asegurase, la mesma J. K. Rowling va ser productora executiva.
Otru de los anuncios ye d’una serie que yá conocíemos, pero de la qu’agora nos dan avance: ye la protagonizada pol villanu de The Batman que, de nueves, como na película de Matt Reeves, interpreta Colin Farrell. The Penguin trescurre dempués de dicha película, y afonda nel mundu criminal de Gotham. Podéis ver el primer avance calcando equí.
Tamién ta, ente los anuncios, la precuela nueva de Game of Thrones, A Knight of the Seven Kingdoms: The Hedge Knight, qu’adautaría la primer obra de triloxía de George R. R. Martin que se recopiló col mesmu nome; esto ye, The Hedge Knight, The Sworn Sword and The Mystery Knight. Estes obres traten d’un caballeru y un escuderu, Dunk y Egg, que viven aventures unos noventa años primero de lo asocedío na saga orixinal. Por supuestu, tamién ta planiada una segunda temporada de House of the Dragon.
Per otru llau, y anque tovía nun tenemos títulu nin argumentu, sabemos que preparen una serie ambientada nel llamáu “wanversu” (por ser el direutor James Wan l’arquiteutu); esto ye, l’universu d’horror que comparten les películes de The Conjuring, Annabelle, The Nun y La Llorona.
Y arriendes de too esto, por si vos paecía poco, tenemos otros anuncios como la vuelta de True Detective con una cuarta temporada, Night Country, protagonizada por Jodie Foster y Kali Reis. Otru ye’l de la estrena de The Sympathizer, ambientada na Guerra de Vietnam y con Robert Downey Jr. faciendo dellos papeles distintos. Y tamién ta The Regime, una hestoria na que Kate Winslet va interpretar a la dictadora d’un país ficticiu d’Europa.
Al igual que Netflix, Max anuncia que va tener un plan de soscripción más baratu empara tener de tragar unos cuantos anuncios. Cuando sepamos el preciu que va costar cada plan n’Europa contámosvoslo, por supuestu.
