Qu’hai filos conductores ente la lliteratura y los videoxuegos sabémoslo dende va cuantayá: Les noveles de Geralt de Rivia o Harry Potter acabaron en forma de videoxuegu al algame de cualquiera que pasare pela tienda o los quixere descargar nel Steam.
Dacuando, amás de les noveles de fantasía más exitoses, déxense ver títulos basaos en xuegos de rol, como ye’l casu de Cyberpunk 2077 basáu nel xuegu homónimu (del que yá falemos en Refuelgu y que ta pa salir esti añu), o Bloodlines 2, basáu nel xuegu de rol “Vampire: The masquerade”, col que munchos interpretamos a personaxes que pertenecíen a clanes como los Malkavian, los Toreador o los Gangrel.
El Señor de los Aniellos, Assasin’s Creed (basáu na novela eslovena, Alamut), Metro 2033 o la crítica a los trabayos d’Ayn Rand que fai Bioshok. Pero a lo que nun tamos nada avezaos los que xugamos a videoxuegos, ye a ver verdaderos clásicos de la lliteratura adautaos a esti formatu. Y ye qu’ún imaxínase primero a Robin Hobb qu’a Shakespeare, a Asimov qu’a Tolstói adaptaos. Por eso sorprendiónos muncho ver “Metamorphosis”, una adautación de la obra homónima de Kafka al videoxuegu. El xuegu entá nun ta a la venta, pero sí ufre una demo de baldre que podéis descargar equí.
La demo xugable de Metamorphosis
En Metamorphosis esconsoñamos nun cuartu vacíu nel qu’hai una nota. De mano, somos un humanu que puede dir moviéndose per él. Más alantre, en saliendo del cuartu (que’l personaxe diz nun reconocer, pensando en voz alta), diremos per un pasiellu llargu hasta aportar a otru onde mos diremos yá faciendo pequeñinos y habremos de buscar la manera de dir abriendo le spuertes. Llueu, vamos viendo cómo les semeyes de la casa van cambiando de car – ún de los meyores momentos pa nós – y van alquiriendo rasgos d’inseutos. Hasta yá acabar convertíu no que paez ser una araña (pol númberu de pates).
Pente los “poderes” qu’esplora la demo, déxase entrever amás de lo obvio de la capacidá de saltar y movese, la posibilidá de soltar daqué llíquidu pegañosu pa poder esguilar peles muries verticales (como, en realidá, faen munchos inseutos).
La demo ye curtia enforma (nun da pa muncho más de 5-10 minutos) pero ye abondo pa danos una idea de qué ye lo que vamos ver en Metamorphosis. Tocante al preciu de salida, nun hai tovía anuncia oficial na web de Steam, pero fálase de dalgo más duna veintena d’euros.
