El caberu añu nun foi un bon añu pa los eventos, festivales y convenciones: munchos d’ellos nun se fixeron, o pasaron a ser en llínia o tener otros formatos. N’Asturies tuvimos en xunetu de 2020 el Celsius 232, y en setiembre la Cometcon, repartíu per dellos sitios de Xixón. Esti ye’l formatu que siguió esti añu la Metrópoli.
La Metrópoli Xixón entamó’l so percorríu en 2014, nel Recintu Ferial Luis Adaro, como un festival qu’arrexuntaba conciertos, cine, videoxuegos, cómics, series,…con dellos puestos y food trucks nes zones esteriores del recintu. Dientro del Metrópoli entamó a facese la Metrópoli Comiccon, un eventu d’ociu alternativu con invitaos del mundu del cosplay y del cómic y dellos autores y actores, a que tamién había esposiciones venceyaes a universos cinematográficos de xéneru. L’eventu siguió espoxigando hasta 2020, añu nel que tuvo que cambiar de formatu y suspender parte de les sos actividaes pol coronavirus.
Esti añu l’eventu tornó colos conciertos y cola Metrópoli Comiccon, distribuyíos en distintes findes de selmana y espacios como l’Antigua Escuela de Comerciu o la Plaza de Toros y con una montonera d’actividaes.
No que cinca al cosplay, les invitaes cosplayers foron Phirate CR y Ventura Cosplay, que tuvieron per ellí firmando prints y tamién hebo un alcuentru colos sos siguidores. Diben ser tamién el xuráu del concursu de Cosplay (que diba facese na Plaza de Toros el domingu), pero nun se fizo a la fin por falta de participantes. Magar esto, el que sí se fizo foi’l concursu de cosplay especial con mascotes nomáu Comic Dog, nel que tienes que dir mazcaráu cola to mascota. Esti añu ganó una pareya col perru vistíos de la película Aladdin. Amás tuvo como invitada la streamer, tiktoker, rolera y influencer Hurona Rolera, que tamién tuvo un alcuentru colos sos siguidores y a la que foi posible conocer ellí.
Tamién tuvo nel eventu Moderna de pueblu, una ilustradora y autora de cómics española, conocía poles sos viñetes e ilustraciones crítiques y satíriques venceyaes al femenismu y a la igualdá.
Nel apartáu de cómic tuvieron autores que trabayen con Marvel como Salvador Espín, un habitual yá del eventu, Iban Coello, Belén Ortega y Ramón Rosanas. Tamién tuvo firmando la so obra Isaac Fernández, tamién conocíu como Loulogio.
Tolos años hai dientro de la ComicCon invitaos actores (otros años hebo invitaos, por exemplu, del elencu de Xuegu de Tronos). Esti añu visitó la Metrópoli Femi Taylor, l’actriz qu’interpretó a Oola nel Retornu del Jedi. Yera posible consiguir, previu pagu, un autógrafu firmáu por ella y facer fotos.
Munches de les actividaes repitiéronse en distintos díes col envís de dar más oportunidaes y flexibilidá a los asistentes.
La Comiccon tamién tuvo’l so espaciu habitual de xuegos de mesa, el Metroludik, onde se pudieron prebar xuegos como’l Paleo o’l Tortuga 2199. Lo que nun hebo foi otru de los habituales, l’Artist Halley, nel que distintos ilustradores y artesanos poníen los sos puestos y ufríen les sos creaciones. Tamos naguando porque l’añu viniente si que lu haiga.
Yá fuera de les actividaes de la Comiccon, hai que mentar qu’hebo una esposición Dinoworld, un Freestyles y que los conciertos entá nun acabaron y tovía queden dellos nes selmanes vinientes, como’l d’Estopa o’l de Vanesa Martín.
Con un formatu diferente paez que los eventos tán volviendo a facese con dellos formatos distintos, pero ufriendo opciones d’entretenimientu y ociu alternativu que yá teníemos gana de que volvieran.
