El gran videoxuegu de rol táuticu de Marvel, desendolcáu por Firaxis y 2K Games, va tar yá en nada disponible pa PC y toles plataformes. Y la verdá ye que pinta caldía meyor. L’argumentu: un equipu de superhéroes de lo más abigaráu va tener d’enfrentase a la villana Lilith, la madre de los demoños.
El nome vien d’un xuegu de pallabres cola saga de cómics y llinia editorial Midnight Sons, na que s’axuntaben los personaxes más siniestros de la editorial.
A piques d’estrenalu (sal a la venta’l 2 d’avientu), la so canal de YouTube asoleya dos videos nuevos más colos que ponenos los dientes llargos. Ún (que podéis ver calcando equí) amuésanos lo prestosos que van ser los combates, y otru (equí) céntrase en dellos escenarios. ¡Esfrutáilos!