Por Adrián Carbayales
El qu’equí vos escribe tien un rixu pola película de los noventa, que lu pilló nuna edá a la que, nunca meyor dicho, embruxilólu. Puru horror adolescente, nel qu’unes rapaces garren mal camín y s’adientren na maxa negro; yera como una versión d’institutu de Les Bruxes d’Eastwick, que viera siendo enforma más neñu y diérame velees unos cuantos años. Conque cuando salió’l reboot sentíme empobináu a facer flaires, ver el clásicu de nueves y, darréu, la versión nueva. ¿Que cambiaría d’una xeneración a otra? ¿Estropiaríen l’alcordanza de la orixinal? ¿Les ganes d’adautase a les sensibilidaes d’anguaño echaríenlo too a perder? Nun me prestó lo qu’atopé, pero non polo que se pue pensar de mano.
La verdá ye que lo que creyía un clásicu nun avieyó nada bien. Que la película pue vese, tien un daqué, pero los personaxes son simplayos como ellos solos. Nel aquelarre tenemos la rapaza acabante d’aportar a la villa, que como ye una pinina pura y virxe va ser la protagonista. Cuando pue usar la maxa vese que nun tien demasiao arguyu, pos fai que se namore d’ella un castrón qu’anda pehí diciendo que se la calcó. Tamién ta l’acomplexada, que lo que pide ye tar bollu porque con eso yá-y val. Tenemos la negra, de quien la personalidá paez que nun va acullá d’eso; el so problema ye qu’hai una faltosa racista que la ensandez. Y llueu ta la grillada de familia desestructurada, que nagua por más poder y a quien la cosa se-y va de les manes. A la cabera interprétala l’agora cuasi desapaecida Fairuza Balk, que paez ñacida pal papel y que namás col magnetismu que tien fai de la película daqué decente. Sacante ella, nun hai más nada que salvar. Eches unes rises, pero yá.
La película nueva, por embargu, tenía toles de perder. Yá-y cayera una bona nes redes y nes crítiques profesionales, acusándola unes y otres de ser una versión desaborida d’un clásicu que fixeren acordies a “l’axenda de xéneru” esa de la que toos falen pero que naide nun sabe quién escribió. Sicasí, pones la película y yá de mano ves que les actrices son rapaces de verdá, non muyerones de trenta años faciendo que tienen dieciséis. Llueu ves qu’una de les bruxes ye negra y otra transexual (tamién l’actriz), pero nun aluden a ello más que nuna llinia del guión. Tamién ves que la protagonista nun fai que’l faltosu se namore d’ella, sinón que se vuelva más sensible y dexe d’esmangallar. Ella nun ye una santa virxinal y amuesa una personalidá bien complexa, pelo menos pa lo que tamos avezaos. Y nin les rapaces s’engarrien ente elles (non tanto), nin l’enemigu ye una que se vuelve escontra d’otra. A ver, sigue siendo una película pa pasar el ratu y poco más, pero ai, manín, esto yá ye otra cosa.
El fondu y l’argumentu de dambes dos películes son bastante cenciellos, nun hai que lo negar. Pero’l mensaxe que la primera da a les guaḥes ye “mira con quién t’axuntes, qu’hai muncha bicha”, mientres que’l de la segunda ye más bien “cudia de les amigues, qu’hai munchu bichu”. Yá namás que por eso paga la pena que la fixeren.
Hemos d’aceutar que los títulos de les películes clásiques son un reclamu más pa vender les nueves, conque vamos siguir viendo cómo les actualicen. Nun siempre nos va prestar, pero más val que teamos preparaos pa ello y nun les prexulgar. Arriendes de que naide va quemar les vieyes, ehí van siguir; y, como ye’l casu d’esta, les nueves puen guardar dalguna sorpresina pa los amantes de les anteriores. Nun digo más, y si vos lleva xera lo meyor ye vela.
