De siempres hai quien s’aprovecha del trabayu d’otros, y l’arte nun ye una esceición. Y nun nos referimos con esto a representantes comenenciosos, o xentecaya d’esa mena, sinón d’aquellos que, anque tamién artistes, plaxen obres nomaes p’aprovechar el so poder d’atraición. Na lliteratura hai casos sonaos como’l del Quixote d’Avellaneda, que según dalgunos foi determinante pa que saliera una segunda parte escrita por Cervantes. Sorprendentemente, tamién tienen acudío a esta táutica autores a los que nun paez que-yos ficiera falta, como fizo Maurice Leblanc, creador del lladrón Arsène Lupin, cuando se-y ocurrió enfrentalu a un detective llamáu “Herlock Sholmes”. Namás podemos entender que se-y ocurriera cosa tala por pura diversión, como a los aficionaos qu’anguaño faen fanfics de les sos sagues favorites pa xubilos de baldre a Internet, o escritores de pastixes (nun miro a naide) qu’aprovechen personaxes de dominiu públicu o truquinos pa safase de los drechos d’autor.
Como nun podía ser d’otra forma, esti fenómenu repítese tamién en cine, y non namás nes parodies o les versiones pornográfiques. Pueque Nosferatu (1922) fora la primer película que copió bultablemente otra obra, siendo una versión de Drácula que ficieron ensin permisu, y que denunció vilba de Stoker. Demostró, eso sí, que de xemes en cuando’l plaxu podía dir xuncíu a la calidá. Y a lo llargo del sieglu XX surdieron munches otres películes feches con tol descaru’l mundu, como la demasiao paecida a Creature from the Black Lagoon (1954), The Monster of Piedras Blancas (de 1959 y afayada en Piedras Blancas de California, non en Piedrasblancas de Castrillón), o les segundes partes non oficiales de Dawn of the Dead (Zombie 2, 1979) o de Terminator (Terminator: Shocking Dark, 1989). Como ye normal, estes películes solíen recibir denuncies o, pelo menos, crítiques de los autores orixinales. Y llueu había países como Turquía, al que, por mor de la censura, dio-y por facer plaxos de toles películes famoses, como Superman o The Exorcist.
Por embargu, nun foi fasta’l sieglu XXI que daveres hebo quien fizo industria internacional de cometer tales otomíes. Y ye que The Asylum especializóse en crear enxendros como Transmorphers (Transformers pa disléxicos) o Titanic 2 (sí, lleísti bien, ¡Titanic 2!). El procesu pa faceles ye bien cenciellu: por regla xeneral, miren de facer una versión de la postrer superproducción de moda, poniendo cuatro perres y un poquitín de procuru pa que nun seyan a denuncialos. La producción ye tan curtia que puen sacala al empar que la orixinal, anque escomiencen a producila dempués de que salga l’avance, pa poder velu primero y saber meyor qué ye lo que tienen de copiar. Nun ye raro que tiren d’estrelles escaecíes como Lorenzo Lamas o Casper van Dien, que-yos salen al esbaratu y gana poner los sos nomes bien grandones en cartelu. Y davezu, pa refugase de problemes llegales al copiar d’una manera tan descarada, suelen guarecese na sida de qu’usen personaxes de dominiu públicu, como los de cuentos populares nes películes de superhéroes Avengers Grimm y Sinister Squad. Rumpelstiltskin, por exemplu, val de Loki na primera y de Joker na segunda.
(Nun ye daqué de lo que se puea fardar abondo, pero, cuando Asylum entrugó n’Internet de qué película quería’l públicu una segunda parte, el qu’equí escribe propunxo con gran ésitu un crossover ente dambos dos grupos de superhéroes, más d’ún de los actores protagonistes dio-y like y, como un añu y picu dempués, anunciaron Avengers Grimm: Time Wars, película na que tamién apaecen personaxes de Sinister Squad. Y tres d’esta posina pa emponderame, tornemos a la custión.)
Nun se sabe de película d’Asylum que perdiera dineru. Son tan barates que p’amortizar lo gastao-yos basta con vendeles a dalgún canal que les eche a deshora, y son una chambonada tala que-yos salen aficionaos ente los amantes del feísmu que merquen los Blu-ray, conque siguen faciéndoles, siendo delles de les últimes Top Gunner, Battle Star Wars o Planet Dune, la verdá que con meyores medios qu’al principiu. Otres compañíes apuntáronse al negociu, tovía con menos perres y que paecen competir por ver quién ye a sacar el churru más gordu. Pel momentu, la que nos paez la peor de toes ye The Amazing Bulk, película qu’encamentamos seriamente nun tentar de ver, pol bien del xacíu de los nuesos llectores.
Mención aparte merez l’actor Robert Bronzi, un húngaru que principió la so carrera como xérif en Port Aventura y dempués trabayó nel Mini Hollywood d’Almería. Ellí atopólu un direutor californianu qu’ablucó al ver que yera calcáu a Charles Bronson, y dende entós protagoniza películes de serie Z qu’imiten les d’él. Nun ta del too mal Death Kiss (2018), secuela non oficial de Death Wish, les películes eses nes que Bronson facía de xusticieru caleyeru porque en cada una forciaben o mataben a daquién cercanu a él. Hai que dicir que ye un poco rara; fala poco pa que nun se-y note demasiao l’acentu, anque eso-y da como un aire pensatible.
Y en presentando un xéneru tan raru, dexámovos a vós decidir si queréis arriesgavos a probar a ver una d’estes películes. Aconseyámosles a quien echa de menos aquelles de monstruos y catástrofes planetaries que poníen en La Sexta primero de que Liarla Pardo/LaRoca ocupara tola tarde. Y a los que non… bono, nunca nun ta de más saber qué ye esti inventu, anque seya por interés sociolóxicu.
