Ente tantes novedaes coles que mos afueguen llibreríes y editoriales a cada poco (día del llibru, día de les lletres, feries del llibru, LibrOviedo… etc) cuesta muncho estremar qué val la pena de lo que non. Dende llueu, lo que paga la pena lleer dependerá siempre de gustos y preferencies personales. Pero’l blogue asturianu “Modus Leyendi” intenta facer esbillar un poco y ayudar a que la xente-y guste la llectura: Dende reseñes y análisis y a entrevistes y recomendaciones. Modus Leyendi ye una de les referencies de la llectura n’Asturies con más de 20.000 visitantes…
El blogue, qu’esistía dende 2013, esperimentó una renovación importante col andanciu y el llanzamientu del proyeutu “Biblioathon”, una iniciativa específica p’afalar a la llectura. ¿Cómo funciona? Bien cenciello. El proyeutu Biblioathon funciona de mou asemeyáu a los “challenges” virales que tantu ésitu tienen, sobre manera pente la xente mozo. D’esti mou, cada mes, Sara y Yaiza, les responsables del blogue, llancen una serie de propuestes a los sos siguidores como, por casu, lleer llibros con presencia LGTB (ye’l retu de xunu). En lleéndolos, los participantes han completar una ficha y xubir a les sos redes sociales el llistáu de títulos que lleeron, entrando en sorteos y demás.
Les propuestes de los “Biblioathon” son siempre fresques y innovadores, afalando a los llectores a salir de les sos “zones de confort” y diendo hacia xéneros que nun esploraren. D’esti mou, delles de les propuestes que fixeron foron entamar llectures n’idiomes nuevos que nos que nun lleeren (xineru), llectures postcoloniales d’autores d’antigües colonies britániques (abril) o otros tan raros y prestosos como lleer un llibru con portada azul pal “blue monday”.
Pa los meses de xunetu y agostu los retos son daqué diferentes, les autores proponen lo que se llama un Readathon (maratón llectora). Los díes 9 y 11 de xunetu y 23 y 25 de xunetu van facer una maratón llector de 24 hores lleendo llibros pendientes espublizaos nel 2020 y 2021. Y los díes 13 y 15 y 27 y 29 d’agostu una maratón llectora de 24 hores lleendo llibros pendientes espublizaos nel 2019 o enantes d’esi añu.
Si queréis participar nellos, nun escaezáis siguir la cuenta de Bookstagram @modusleyendi y la so páxina web www.modusleyendi.com
