Por Adrián Carbajales
Anguaño, no que llamamos la posmodernidá, decatámonos de que les llendes ente’l bien y el mal son más turbies de lo que nos prestaría. Les coses nun son cencielles como en pasáu, nel que too paecía ser blanco o negro. Agora sabemos que lo que más abondante en mundu son los tonos buxos, y cuasi nunca los bonos son tan bonos como creyen nin los malos tan malos como los presenten.
La ficción, como nun podía ser d’otru mou, espeya esti sen nuevu, y surden más obres que protagonicen héroes con defeutos morales y nes que los motivos de los sos enemigos tienen bona comprendoria. Yá nun non presta migayu lleer hestories con antagonistes simplayos, que seyan maliñosos ensin farda nenguna.
Y asina, tamién hai quien reinterpreta y moderniza los villanos clásicos, dándo-yos una vuelta y emponderándolos al desvelanos aspeutos desconocíos de les sos vides, socesos colos qu’amuesen que teníen más envís que’l simple porgüeyu y colos que llogren metenos en bolsu. Esti ye’l casu de Moriarty el patriota, un shōnen (esto ye, un manga pensáu sobre too pa los rapazos) qu’en Xapón asoleya la revista Jump SQ y que Norma Editorial ta agora espublizando en castellán.
Nesti, el guionista Takeuchi Ryosuke (All you need is kill) y el dibuxante Miyoshi Hikaru (Kanshinkan Tsunemori Akane) preséntennos una versión de James Moriarty, el gran enemigu de Sherlock Holmes, mui distinta a les que conocemos. Y ye que descubrimos que, tres de la so rede criminal y los sos asesinatos, nun s’alcontraba la cobicia. La verdá ye que cometía tales atomíes por una causa bien noble.
Argumentu:
Un mocín, el mayorazu’l conde Moriarty, atopa un rapaz mui especial n’hospiciu nel que trabaya de voluntariu. Ye un xeniu, un cabezaleru de natura, y al que fasta los paisanos van a pidir conseyu sobre toa mena de coses. Coses que nun siempres son llegales. Y un día, Moriarty óyelu afalar a los demás guaḥes pa qu’acaben con tolos aristócrates qu’aprovechen la so posición pa cometer perversures, pos viven nun sistema inxustu qu’hai qu’iguar pol bien d’ellos y de tol país. Odiando Moriarty la sociedá clasista tanto como’l rapaz, decide facese cargu d’él y del so hermanín, anque a la familia nun-y faiga nenguna gracia acoyer neños de clas baxa. Sicasí, esta tensión nun va durar muncho, pos los yá hermanos Moriarty escomiencen per ella a desendolcar los sos planes.
Trece años dempués, los trés entamen una organización criminal na que’l Moriarty medianu fai d’asesor pa colos más humildes, ayudándolos a vengase de la crueldá impune d’aquellos a los que protexe’l sistema social. Y mentanto, va tresnando con estos asesinatos les condiciones afayadices pa qu’aporte una revolución. Una na que’l mesmísimu Sherlock Holmes tien un papel, anque entá nun lo sepa.
Crítica:
Alcontrámonos énte un shōnen del que llama l’atención la falta d’aición y engarriaes, siendo más adultu ya intelectual que la mayoría de lo qu’hai en mercáu. Ye de xéneru detectivescu, magar que cola orixinalidá d’amosanos los casos al aviesu: Vemos cómo Moriarty desendolca crimes perfeutos más qu’a Sherlock deduciendo qué ye lo qu’asocedió. Magar que los capítulos van rellatando casos relativamente independientes, la trama xeneral avanza más axilosamente de lo que podría paecer y nun se ve torgada por ello.
Tocántenes al dibuxu, ye menester dicir que ye elegante y espresivo. Los protagonistes tienen un aire amuyeradino que paez más propiu del xéneru shojo (el manga pensao pa rapaces), dándo-yos un aspeutu tan estremáu al de les ilustraciones clásiques que llogra qu’escaezamos les hestories de Doyle y nun les tentemos de comparar. Na reproducción de la época nótase que Miyoshi se documentó farto sobre l’arquiteutura y la ropa victoriano, y represéntalo con muncha curiosura y detalle.
La crítica a la sociedá de clases del Imperiu Británicu, pela so parte, pue abultar cómoda y simplera; güei, tala desigualdá resulta indefendible. Pero dientro de la hestoria ye a afitar, nuna ideoloxía revolucionaria propia de la dómina, el porqué de l’aición de Moriarty. A ver, nun nos enquivoquemos, tampoco nun ye que lu santifique. El protagonista nun tien problema en poner la fin pencima los medios y llevase per delantre a quien seya necesariu si con ello llogra un bien mayor. Si asina fai más bien o mal ye custión de la perspeutiva del llector.
Ye nidio que la obra ye dafechu un refritu, lo qu’entendemos que pue echar p’atrás a dalgún llector. Por embargu, nun amuesa complexu dalu por selo. Los autores aprovechen la llibertá que-yos da que los personaxes seyan de dominiu públicu pa garrar tolo que-yos peta y dexar dir lo que nun-yos interesa, camudando los socesos de les obres orixinales pa que digan más col tonu de lo qu’ellos quieren cuntar. Inclusive faen chancia d’estos cambeos, como na ocasión na que’l redrueyu abluca al ver cómo representen al so hermanu (en viendo la imaxe clásica del Profesor Moriarty, vieyu y con aspeutu utrín) o cuando Sherlock comenta que’l diariu de Watson (les noveles) nun correspuende colo que pasó daveres. Esto allixera’l tonu la hestoria, aclariando que tampoco nun se toma más en serio de lo qu’habría.
En resultancia, Moriarty el patriota ye un manga llivianu pal puru entretenimientu, magar que guapu, curiosu y enllenu referencies. Y d’estes nun se decatarán namás los que lleeron les noveles, sinón tamién quienes conozan los personaxes de dalguna de les películes o series de televisión. Amuésanos un llau nunca vistu de la mitoloxía sherlockiana, y alcontrase daqué asina pente un argayu de versiones, de les que la mayoría namás asegunden la obra de Doyle, ye toa una prestosura.
