Nos caberos años tamos siendo testigos de cómo les llibreríes pierden la so importancia como puntu d’alcuentru de la sociedá, pero… ¿pueden morrer tamién d’ésitu?
Les llibreríes son sitios onde poder suañar: son un refuxu pa la cultura; por eso mesmo tornamos siempre a elles, porque nes sos estanteríes podemos topar igua pa tolos problemes del mundu. Estos puntos d’alcuentru de barrios y ciudades, faros na nueche de la inorancia, camudaron abondo nes caberes décades: pasaron del modelu de llibrería/quioscu al de llibrería papelería y, por mor del llibru lleutrónicu, entraron en crisis.
Agora mesmo, los supervivientes del naufraxu siguen dos esquemes pernidios: les llibreríes especializaes y gourmet y les llibreríes-cafeteríes. A vegaes, inclusu, mézclense ente sí y aporten nueves esperiencies. Sicasí, la gueta de nuevos modelos colos que dar puxu al seutor llibreru nun garanticen la bona salú del mesmu. Nel meyor de los casos, trabayar con llibros supón brengar nuna trinchera en mediu de tolos frentes.
Con esta reflexión aporté fae unes selmanes a Lello, en Porto. Esti negociu tamién ye conocíu como la llibrería más guapa del mundu, la llibrería qu’inspiró l’ambientación de Harry Potter. Dambes son apodes: el llugar impresiona enantes d’entrar con una fachada d’otra época… Y con unes coles pa entrar que lleguen a les dos hores nel meyor de los casos, peor agora col andanciu.
La Livraria Lello ye una ayalga del modernismu portugués que ta bien cerca de los puntos turísticos de la ciudá, afitada en mediu de grandes almacenes a la portuguesa que conformen la identidá de la capital. El grupu que la xestiona, dempués de ver cómo aumentaben les visites al llugar, decidió controlar l’accesu con entraes a 5 €, dineru que se podía descontar dempués del preciu d’un llibru, fore esti nueu o de vieyo. A priori nun debiera dar más que les llibreríes topen otros modelos de financiación nun venceyaos a la tradición. Trátase d’eso o de morrer.
La midía, en sigo, tien munchu xacíu. Lo que nun lo tien tanto ye que la xente qu’acude a Lello y ye pa tar dos hores na cai llueva (que suel llover, y muncho, en Porto) o faiga sol (como foi el casu, 30 graos qu’afogaben a les 9:30 la mañana) entre p’allá como quien entra pal Primark a facer babayaes colos collacios o conocíos. Prueben llibros pa sacar les semeyes nes famoses escaleres como quien pon unes gafes de sol en forma de piña colada y marchen a los 10 minutos ensin topar un res. O ensin intentalo siquiera. Vien a ser esto un Tinder turísticu.
Que nun se m’entienda mal, voi defender a muerte siempre les llibreríes. Pero una tien el corazón blandiu y s’inclina más pol tratamientu consistente, anque seya n’apariencia. Sicasí, en Lello, por mor de l’afluyencia de xentes de tolos requexos del mundu, el cliente ye’l que manda.
Asina la que ye la llibrería más famosa de too Portugal dedica, como poco, tres cuartes partes de la planta baxa a obres editaes n’otres llingües pero non col envís de divulgar la xenial lliteratura portuguesa, sinón clásicos conocíos por toos ente los que, de xemes en cuando, pueden topase dellos lusos: Arguyu y prexuiciu, Madame Bovary, El Quixote, Amor de perdición, Peter Pan, Les Aventures de Tom Sawyer, El Magu d’Oz, Los Maias, Romeo y Xulieta, El Gran Gatsby… Mientres, nel fondu la primera planta, aguarden les primeres ediciones de grandes obres de la lusofonía, y quien tenga perres puede inclusu mercar tomos d’Eça de Queirós o Fernando Pessoa valoraos en más de 1000 euros.
Hai espacios pa la trivialidá y que chisguen a los mozos (y no tan mozos) con estanteríes enllenes d’ediciones de Harry Potter por llingües, collores de les cases, ilustraciones y tipu d’encuadernación; delles estanteríes son testigu de la contemporánea portuguesa con selleiciones que, si bien pequeñes, tienen gustu; tamién hai una cripta dedicada al maxestuosu Cantu X de Los Lusíadas nel sótanu qu’enllena les parees.
En definitiva, nesti llugar d’aspeutu máxicu y maxestuosu, nesta ayalga arquiteutónica y artística que ye referente cultural conviven xeitos diversos y munches contradiciones. Contradiciones porque guarda braeres ayalgues pa la lliteratura portuguesa y universal, cuando’l so espaciu ta tomao por xente que namái va por sacase la semeya. Contradiciones porque al lláu de les 500 copies d’Arguyu y prexuiciu nun hai más que cuatro coses de Peixoto, Saramago, Bessa-Luís, Correia. Contradiciones porque adautaron totalmente’l catálogu de la llibrería pa facilitar que la xente, yá que paga por entrar, marche con un llibru, perdiendo asina a tolos portuenses que yeren fieles clientes.
¿Puede una llibrería morrer d’ésitu? Complicao… Lo que sí puede ye perder l’alma y eso, na Livraria Lello, aconteció fae tiempu.
