Nada menos qu’en 1958 foi cuando Francisco Ibáñez sacó la primer historieta d’estos personaxes, probablemente los más famosos nel mundu enteru del novenu arte español. Al cabu y al cantu, tien hasta traducciones al alemán, y son unes cuantes películes les que tienen salío. Y magar qu’Ibáñez yá tien fechos los ochenta y siete años, suel sacar como dos volúmenes al añu de los siempre mozos Mortadelo y Filemón.
Per otru llau, ello pue debese a un escándalu, espardíu va poco, y ye l’usu habitual del autor de “negros” dende los años sesenta que denunció en redes David Rubín (otru artista nomáu) cuando lu quixeron proponer pa ganar el Premiu Princesa de les Artes, a mou de boicó de la candidatura. Y ye que’l dibuxante Juan Manuel Muñoz, masque nun apaeció nunca nos creitos, contó nuna entrevista de 2018 que llevaba más de trenta y cinco años retocando y entintando los dibuxos de les historietes, afirmando que nun entendía por qué escondelu si eso nun desmerecía a Ibáñez como creador.
Sicasí, polémiques aparte, el casu ye que los axentes de la T.I.A. vuelven con ocasión del Mundial de Baloncestu (como yá tienen fecho unes cuantes vegaes, al igual que colos Mundiales de Fútbol, les Olimpiaes y hasta les eleiciones, pos Ibáñez ye mui d’aprovechar estos acontecimientos). Nesta aventura vamos ver cómo resuleven la misión pa la que los manda ehí’l Súper, que ye encárga-yos descubrir y detener a quien seya que se ta dedicando a encoyer xugadores (sí, sí, en plan Ant-Man) p’asina amañar los partíos.
L’álbum sal, como yá vien siendo vezu, tanto en castellanu como en catalán. ¡Ah! Y, dientro d’unos meses, vamos tener tamién La vuelta al mundo, onde vamos ver a Mortadelo y Filemón visitando Roma, París o Nueva York.
