La cuenta oficial de Twitter de Mortal Kombat apuntó va unos díes a ello, con un contador que pasaba del númberu once (la saga de videoxuegos tenía once entregues hasta agora) al ún. Ye por ello que nun pilla demasiao por sorpresa’l rellanzamientu de la saga con un videoxuegu nuevu que nos lleva al escomienzu d’esta, pero l’avance ye tan espectacular que nun ta dexando a naide indiferente. Sicasí, ¿tenemos claro que ye un reiniciu? La verdá que non dafechu.
Yá la novena parte del xuegu yera un reboot sele de la continuidá demasiao enguedeada, yá que l’argumentu consistía en que Raiden viaxaba al pasáu, al comienzu del primer xuegu, y cambiaba les coses pa que non fueren tan mal pa los héroes. Esta parte nueva pinta a que va ser un poco lo mesmo, porque n’anterior Liu Kang, convertíu en Campeón de la Tierra y Dios del Fueu, quedaba cola xera pendiente de restaurar la llinia temporal. Paez que ye precisamente eso lo que fai nesti, conque taríemos de nueves ente un reiniciu xustificáu polos viaxes nel tiempu (al estilu de les películes nueves de Star Trek) al crear Liu Kang una realidá nueva. Si ye un universu que vien a sustituyir pa siempre’l definititivu ye dalgo que tovía nun sabemos, pero la cosa pinta a qu’esa va ser parte importante de la llinia argumental del xuegu.
De momentu tenemos como lluchadores confirmaos a los clásicos Liu Kang, Raiden, Scorpion, Sub-Zero, Kitana, Mileena, Johnny Cage y Kung Lao. Y Ed Boon, desendolcador dende’l principiu de la saga, destaca tamien un elementu nuevu del xuegu: los “Kombatidores Kameo”, qu’asistiríen a los personaxes mientres estos s’engarrien, y colos que yá cuerren teoríes sobre combos y fatalities conxuntos. A partir de güei mesmu ábrense les ventes anticipaes del videoxuegu, con Shang Tsung como personaxe xugable (que de momentu nun habría otra manera de consiguilu) y una versión beta que sal n’agostu (pa Playstation y Xbox) como recompenses por compralu yá.
L’avance, como dicíemos, ye tremendu, y si nun nos creyéis podéis velu calcando equí.
Mortal Kombat ye una de les sagues más mítiques de videoxuegos de llucha dende 1992, tamién famosa por ser la más sangrina, y de la que se tienen fecho películes, cómics y dibuxos animaos.
