Va namás trés díes que vos falábemos del rellanzamientu de la mítica saga de videoxuegos Mortal Kombat (podéis velo calcando equí), qu’anque nunca nun dexaron de salir entregues nueves, sí ye verdá qu’esti ye’l segundu reiniciu na continuidá, mui probablemente col envís d’acenciellar la historia y que los xugadores nuevos nun se pierdan.
El casu ye que nesta ocasión, según cuenten agora, llega una collaboración mui especial, y ye que, por fin, Jean-Claude Van Damme va ocupar el llugar que se-y tenía acutáu dende l’iniciu de la saga.
El personaxe de Johnny Cage, qu’amás de lluchador ye estrella de películes d’aición en Hollywood, y resulta, amás, qu’a los creadores de Mortal Kombat contratáronlos, poco enantes de sacar la primer parte, pa facer una adautación a videoxuegu de la pelicula Universal Soldier. Y anque esi proyeutu acabó pa prau, el personaxe de Cage vien d’ello, tando basáu nel protagonista de la película… Jean-Claude Van Damme.
Y siendo’l mesmu actor quien comentaba va unos meses en Twitter, cuando los fans lu propunxeron pa facer del personaxe na segunda parte de la película de Mortal Kombat (2021), que-y encantaría facer cosa tala (magar que yá taría un poco mayor pal papel), agora anuncien que, pal xuegu nuevu, Johnny Cage va tener una skin (esto ye, un aspeutu a escoyer) del actor. Y asina, zárrase’l círculu y Van Damme encarna’l personaxe que nun principiu, va trés décades, se basó nél.
Tovía ye pronto pa contar más coses del esperáu videoxuegu, pero tamién se fala de que nel primer DLC incluyiríen, como yá ye vezu, personaxes conocíos d’otres sagues. Nesti casu sedríen trés “superhéroes” de moral más que discutible: Patriot de The Boys, Omni-Man de Invincible y, tamién, Peacemaker, el personaxe de DC (nel que se basa Rorschach de Watchmen) que saltó a la fama con Suicide Squad y agora tien serie de televisión propia.
