Güei estrenamos una estaya nueva d’artículos nel que vos vamos recomendar, cada mes, un dorama coreanu, esi mundu desconocíu al que munchos llegamos pola película de Parásitos, poles suxerencies de Netflix o dempués del éxitu de El xuegu del xibión.
La industria audiovisual coreana vien pa quedar, y el so potencial ye perclaru (solo hai que ver la montonera de series que podéis ver nes plataformes de streaming). Corea ye más que’l k-pop o pop coreanu.
Enantes d’entrar a falar de la recomendación de güei, vamos facevos una idea xeneral de lo que son los dorames. La temática d’estes series ye variada, como la qu’atopamos nes series occidentales. Quiciabes una de les diferencies ye que, polo xeneral, son series con capítulos de munchu llargor: ye normal que caún de los capítulos dure una hora. Amás, lo normal ye que tengan una temporada y nun tengan secueles.
Estos dorames suelen ser mui potentes no que cinca lo visual, y eso amuésalo la inversión qu’hai n’escenarios, vestuarios, actores y estras. Ta too cuidao, hasta los detalles más pequeños: caún de los fotogrames d’estes series son como una semeya profesional.
Los xéneros dientro d’estes series son variaos: hai dorames históricos, dorames cómicos, dorames de misteriu y inclusive dorames fantásticos. Amás, nun ye raro atopar la participación d’actores de fuera de Corea del Sur, que una vez qu’entren nesta industria suelen repetir en más d’una serie (nun hai qu’escaecer que tienen que saber coreanu).
La primer serie que vos vamos recomendar nómase Mr. Sunshine, y ye un dorama históricu, ambientáu a lo cabero del sieglu XIX, un momentu de muncha importancia histórica tamién nesa zona d’Asia. La serie emitióse per primer vez en 2018 y tien 24 capítulos, que podéis atopar en NETFLIX.
Magar que conocemos tolos conflictos d’Europa y América, con bandos y hasta nomes propios de xenerales y dellos combatientes, la realidá ye que ye más bien poco lo que sabemos que taba demientres pasando n’Asia: por saber nun sabemos adulces nin como Xapón terminó formando parte de la Exa con Alemania ya Italia.
La realidá ye que ye muncha y desconocía la historia de tolos conflictos qu’hebo y qu’implicaron, de primeres, a China, Xapón y Corea, y dempués tamién a EEXX, que nun perdió oportunidá de golifar nesi tarrén.
Esti dorama ta ambientáu nos primeros años del sieglu XX, dellos años enantes de qu’entamara la ocupación xaponesa de Corea, pero añu nel que ya s’entamaba a tastiar el conflictu viniente. Ye nesti contestu nel que surde l’enamoramientu ente Go Ae Shin, una moza de l’aristocracia y por Eugene Choi, un neñu güérfanu tamién coreanu, pero que coló a EEXX y volvió a Joseon (el nome de Corea n’aquella dómina) como’l so destín militar.
Go Ae Shin ye una defensora de la independencia de Corea, hasta tal puntu que se viste d’home y dedícase a ser una xusticiera pala xente de Joseon, demientres que Eugene Choi ta nel intre de decidir si va defender EEXX o la tierra na que nació, Joseon.
A lo llargo de la serie vamos viendo como va aumentando la tensión y el conflictu qu’había en Joseon, onde Xapón tentaba d’estorsionar a la xente y EEXX tamién tentaba de tener el control. El mensaxe de la serie ye claru: Joseon quería ser independiente y non depender de nengún, y esto fexo que finara un montón de xente por defender esa idea.
Gracies a esta situación, na serie atopamos personaxes de los tres paises, de los que’l guión nos va contando más de la so vida y por qué actúen d’una manera o d’otra: atopamos a los militares EEXX, a la yakuza xaponesa ya inclusive diplomáticos que tenten de sacar beneficiu pa ellos o por Joseon.
Con esta serie vais poder conocer cómo yera esa Corea, porque si daqué tien la serie ye una fotografía perguapa y unos vestuarios y escenarios percuriaos. Los personaxes qu’apaecen na serie son ficticios, pero tol conflictu ente paises foi real.
Ensin facer spoilers, la serie paga la pena pol desendolcu non solo de los dos protagonistes principales, sinón tamién pol desendolcu de los personaxes que formen parte de la so vida, con histories perinteresantes que filen ente elles d’una manera maxistral. La historia de Corea ye perinteresante, y esta serie amuesa ún de los conflictos más importantes.
Eso sí, garrái pañuelos, porque ye una serie bien dramática.
