Netflix ta atopando un filón es adaptaciones d’anime, y anque tuvo unos cuantos tropezones (aquel espantu de Death Note, y el fracasu de Cowboy Bepop), l’ésitu de crítica y públicu que tuvo One Piece paez dar esperances de que puen facer bien les coses. Agora vien una riestra nueva d’adaptaciones, ente les que s’alcuentren Avatar: The Last Airbender, Sword Art Online o’l popularísimu My Hero Academy. Pero la primera que va llegar, en namás un mes, ye d’una un poco más antigua, anque de xuru que va prestar a los millennials.
Y ye qu’esta ye Yū Yū Hakusho de Togashi Yoshihiro (autor de la tovía abierta Hunter x Hunter), un clásicu de los años noventa del que’l manga tuvo diecinueve tomos, y l’anime más de cien episodios y cinco películes. L’argumentu, ún asemeyáu al que depués usaríen otros munchos mangues, porque evidentemente marcó abondo a futuros autores: Un adolescente rebalbu muerre de manera un poco absurda, y nel Mundu Espiritual úfren-y volver a la Tierra como un shinigami (dalgo paecío a lo que sedría una parca o un güercu n’Occidente). N’aceptando, y faciendo un poco de detective sobrenatural con poderes, el mozu ha enfrentase a demoños y otros bichos pol estilu, recuperar oxetos del otru mundu y viaxar d’un llau pa otru.
Dexámosvos l’avance de la serie nueva calcando equí, y nesti otru llau l’abertura de la serie clásica, pa señardosos y por si a los más mozos vos da curiosidá. ¿Qué pensáis? ¿Tará al nivel qu’amerita como l’adaptación de One Piece, o sedrá otru desastre?
