Ye posible que nun vos suene de nada’l nome, pero esta tortuga xigante ye’l mayor rival (en términos comerciales) d’otru monstruu xaponés que sí que de xuru vos va sonar, Gojira (Godzilla pa los norteamericanos). Gamera, una tortuga escomanada y que vuela pelos aires metiéndose nel cascu y dando vueltes sobre sí mesma, ye un monstruu queridísimu en Xapón y que tien protagonizao una docena de películes, dende que la productora Daiei lu creó como contrapartida del dinosauru más famosu en 1965 hasta la cabera en 2006.
Agora, Netflix llanza un vidéu breve col que nos anuncia que tienen ente manes un proyeutu que lu va trayer de vuelta, Gamera Rebirth, y del que tovía nun sabemos nada, anque, poles traces, podemos albidrar que se trata de dalgún productu d’animación, talamente como les películes o la serie que la canal de streaming yá sacó de Gojira. A la espera de más noticies, dexámosvos col enllaz al teaser (calcando equí) y la imaxe promocional qu’asoleyaron.
