Tovía queda tiempu, yá que la canal plania esta estensión del negociu (a la que llama Netflix House) pa 2025. Pero la noticia ye llamadera, porque asina la más nomada de les canales de streaming decide pasase tamién a los negocios de coses tanxibles. Y failo, amás con un tipu de local del que pelo menos a nosotros nun se nos ocurre nengún referente, porque quieren ser tiendes nes que vender productos de les sos propiedaes intelectuales, que tenga serviciu de restauración (usando tamién les sos series y películes como inspiración pa los platos) y, tamién, “esperiencies inmersives” basaes nes sos franquicies más importantes, como Stranger Things, Squid’s Game o Bridgerton. ¿Y qué ye esto d’una esperiencia inmersiva? Nun lo aclarien muncho, pero, al nun ser un parque d’atracciones al usu, pinta a ser dalgo asina como atracciones que nun precisen munchu espaciu por valise de realidá virtual o aumentada.
Netflix nun tuviera hasta agora nengún local permanente abiertu al públicu, pero sí “pop-up stores” que son locales qu’abren pa unos díes. “Decatémonos de cuánto esfruten los fans somorguiándose nel mundu de les nueses películes y programes de televisión, y tenemos pensao muncho en cómo llevar eso al nivel siguiente” declaró Josh Simon, Vicepresidente de Productos de Consumu de la empresa. La idea ye fundamentalmente interactuar colos espectadores pa que sientan la esperiencia como más propia. Eso sí, yá dexen tamién claro que, nin por escala nin por conceptu, va ser dalgo asemeyao a los parques de Disney, y que nun primer momentu van abrir solo nos EE.UU.
