Jim Lee, dibuxante d’orixe surcoreanu, foi ún de los dibuxantes estrella de los años noventa, tanto que pasó de dibuxar los cómics de X-Men (ente ellos el cómic más esitosu de la historia, con nada menos qu’ocho millones doscientes mil copies vendíes) a crear el so propiu sellu, Wildstorm, na editorial que fundó en 1992 con otros autores del so altor y que nun taben contentos col tratu que-yos daben les grandes editoriales. A esti sellu pertenecen series que foron bien populares, como WildC.A.T.S. (que tuvo serie d’animación nos noventa), Gen13 o The Authority, de la que yá tienen planiada una película.
El casu ye qu’en 1999 vendió Wildstorm a DC Comics, y los personaxes del sellu pasaron a facer parte del multiversu deceeru en 2007, na nomada pa ello Tierra-50. En 2010, Jim Lee pasó a ser co-editor de DC a la xunta del guionista Dan Didio, y xuntos planiaron en 2011 el polémicu movimientu The New 52, col que la compaña facía borrón y cuenta nueva pa la historia de tolos personaxes y actualizaba los sos oríxenes. Nesti status nuevu, Wildstorm dexó d’esistir de manera independiente, y los sos personaxes pasaron a integrase y convivir nel universu principal colos héroes clásicos. Sicasí, como los cambios que ficieron foron demasiao pa los fans, que nun taben contentos col borráu de delles hestories, tamién foi artífiz en 2016 de DC Rebirth, eventu nel que empezaron a recuperase los elementos más clásicos de los personaxes. Y, dende la “salida” de Dan Didio en 2020, Lee convirtióse nel únicu editor en xefe.
Esti miércoles anunciaron qu’agora lu nomen presidente de DC, puestu que taba vacante dende va cinco años. Esti cambiu ye otru más, pos va poco que punxeron a James Gunn a cargu del universu cinematográficu, lo que vieno acompañáu d’una retafila d’anuncios (que vos contemos equí). Queda por ver qué nos va trayer esta escoyeta nueva pal futuru de la compaña.
