Yá lleguen les nominaciones a los Game Awards 2023, que van celebrase a primeros d’avientu. Y la candidatura que más llama l’atención nestos, por supuestu, sobre manera por tolo qu’acarreta (como sacar una edición especial) ye la del premiu a meyor xuegu del añu. Ensin allarganos más, vamos a la llista de los seis nominaos:
- Alan Wake 2
- Baldur’s Gate 3
- Marvel’s Spider-Man 2
- Resident Evil 4
- Super Mario Bros. Wonder
- The Legend of Zelda: Tears of the Kingdom
Asina, el Xuegu del Añu de 2023 ta ente estos, pente los que pue llamar l’atención que s’allugue Resident Evil 4, por ser un remake del xuegu homónimu de 1999. Por embargu, lo que daveres ta causando bastante xaréu nes redes y en distintos portales ye la falta d’un xuegu mui relevante, y esti ye l’esitosu Hogwarts Legacy. Y nun falamos yá namás d’ente los candidatos a Xuegu del Añu, ye que nun entra n’absolutamente nenguna nominación. Los fans daben por supuestu que diba teneles a Meyor Música y Meyor Dirección Creativa, y hai bastante enfadu porque s’apunta, como causa de la so falta, a una razón ayena a la calidá del xuegu, y que sedría la polémica qu’esiste alredor de les posiciones polítiques J. K. Rowling. ¿Ta vetáu’l xuegu por razones ideolóxiques, o ye que, por munchu ésitu que tuviera, nun taba al altor? Dexámosvos a vosotros les conclusiones.
Otros xuegos que rescamplen por gociar de delles candidatures, anque non de la principal, son Cyberpunk 2077 (Narrativa, Interpretación y Cuidáu), Final Fantasy XVI (Narrativa, Música y Banda Sonora, Actuación y Meyor RPG) y Hi-Fi Rush (Dirección d’Arte, Música y Banda Sonora y Meyor Xuegu d’Acción).
