El “Monsterverse” de Legendary avanza a pasiquinos pero firme, con ésitu nes películes que va sacando de poco en poco. En 2014 llegónos la nueva versión americaba de Godzilla, más fiel a la idea orixinal que la de los noventa. En 2017 Kong, que dio vida nueva a una idea que paecía yá mui masuñada, al centrase n’esclusiva na islla y non no de llevar el gorila a la ciudá pa exhibilu. En 2019 sacaron Godzilla: King of Monsters, na que esperimentaben con delles posibilidaes que daba un universu compartíu de monstruos xigantes, y en 2021 sacaron Godzilla vs. Kong, el remake de la engarriada yá vista na película xaponesa de 1962, y na que nos mostraben el centru de la Tierra Güeca y la de so madre. Agora, y magar que de lo que se falaba nun principiu yera d’una segunda parte de Kong, na que nos presentaríen el so fíu (como na segunda parte de la película orixinal), vuelven a facer una película col dúu monstruosu: Godzilla X Kong: The New Empire.
Nesta, por embargu, nun van volver a engarriase ente ellos, pelo menos non munchu tiempu, sinón que, polo que se ve, van tener d’enfrentase xuntos a una amenaza mayor, de la que tovía nun nos quieren dicir nada. Ye dable tanto que seya un monstruu yá conocíu, d’ente toles posibilidaes que da la franquicia xaponesa de Godzilla, o ún dafechu nuevu, como yá tien pasao con “titanes” surdíos nel mesmu Monsterverse. La película tamién va afondar, cuenten, nel orixe de los monstruos y la so convivencia, en tiempos, colos primeros humanos.
La estrena ta planiada pa marzu de 2021, y yá tenemos un avance curtín col que ponenos los dientes llargos. Podéis velu calcando equí.
