Ayer mesmo contábemosvos que la fuelga d’actores diba trayer un retrasu a la segunda parte de Dune, pero nun son too males noticies pa los fans nesti portal. Y ye qu’anque Frank Herbert, l’autor, finó en 1986, dende entós siguen saliendo noveles de la saga mui esitoses, firmaes pol fíu, Brian Herbert, y l’escritor de franquicies (sobre manera d’esta y de Star Wars) Kevin J. Anderson. Polo que cuenten, estes noveles tán basaes en notes que’l pá tenía per casa, y yá superen de llargo’l númberu de les noveles orixinales.
Nesti casu vamos alcontranos ente una precuela mui pegada a la obra orixinal, que trescurre namás dos años primero d’esta. L’argumentu de Princess of Dune, que s’edita n’inglés n’ochobre y va constar de más de cuatrocientes páxines, ye’l siguiente:
“Criada na corte imperial y ñacida pa ser moneda de cambiu política, a Irulan mandáronla con poca edá a que la entrenaren como Hermana Bene Gesserit. Como princesa, tamién deprendió lleiciones importantes de so pá, l’emperador padishah Shaddam Corrino IV. Agora, n’edá de casar, la princesa Irulan ve les maquinaciones de las munches facciones que compiten pol poder: la Hermandá Bene Gesserit, el Gremiu Espacial, el tronu imperial y una rebelión despiadada nel exércitu imperial. La moza tien un calter sabiu y independiente y ta decidida a volvese muncho más qu’un peón que mover nel tableru de xuegu de cualesquiera. Mientres, n’Arrakis, a Chani, la fía de Liet-Kynes, el planetólogu imperial que sirve sol duru gobiernu de la Casa Harkonnen, adiéntrala nos caminos místicos fremen una antigua Madre Reverenda. Criada pa creyer nel suañu ecolóxicu de so pá d’un Arrakis verde, sigue a Liet a les estaciones de prueba imperiales, sobreviviendo a los abondos peligros de la vida en desiertu. Chani descubre ceo’l duru costu de los suaños y obligaciones de los Fremen baxo’l xugu de la llarga ocupación Harkonnen.“
Dexámosvos coles ganes de lleela, pero tamién coles dos portaes que yá presentaron
