El qu’ensin dulda ye l’escritor de literatura de xéneru más importante d’Asturies, Rodolfo Martínez, espubliza un apócrifu más del bárbaru creáu por Robert E. Howard. A partir de les notes del autor texanu pa una hestoria que nunca nun llegó a escribir, Martínez ellabora Polvo entre los dedos, que yá ta a la venta en formato ebook por menos d’un euru de preciu.
La sinopsis de la hestoria diz asina:
“Mientres fuxe de la guardia de la ciudá zamoria na que tuvo robando, el joven Conan atópase les ruines d’una ciudá estraña. Osáu, ambiciosu y tovía inespertu nos garbanzales del mundu civilizáu, adiéntrase na ciudá a la busca de fortuna, desconociendo que nun ta solu y que quiciabes lo qu’achisbe nella seya lletal.”
Esti cuentu sirve como anticipu de la so novela viniente, Bajo la enseña de la Tigresa, Rodolfo Martínez, na que compón una hestoria a partir de dellos proyeutos nunca terminaos por Howard. Esta sedría la segunda gran novela de Martínez sobre’l personaxe, pos yá tien publicada La canción de Bêlit, na que cuenta lo asocedío al bárbaru nos sos tiempos de pirata, ente la primer y la segunda parte del relatu de Howard Queen of the Black Coast.
Si queréis comprar el relatu o a cencielles saber más d’él, de Rodolfo Martínez o de la so editorial, dexámosvos l’enllaz calcando equí.
