Los grandes estudios tán viendo, meyor que naide, que la fartura de superhéroes ta empezando a pasa-yos factura, y too pinta a qu’entramos nuna dómina nueva pal cine y la televisión na qu’esti nun van ser el xéneru dominante. Por embargu, pol grandor de los proyectos qu’estes empreses preparen, hai una inercia que nun-yos permite echar el frenu de sópitu. Namás son a empobinar pa ónde llevar la publicidá, o, en dalgunos casos que ven graves (como pasó cola serie nueva de Daredevil), cargase lo grabao y volver a empezar.
Ye una bona muestra d’esto que les series vinientes, tanto de Marvel como de DC, tán vendiéndose como “esto nun ye de superhéroes”. Per un llau, la ¿superheroína? muda Echo estrena un sellu nuevu de la productora, Marvel Spotlight, que polo que cuenten consiste, básicamente, en “nun has ver primero toles películes y series del Universu Marvel pa enterate”. Siendo una serie de xéneru negru (por mui fantástiques que puean ser delles hestories del personaxe nos cómics), nun quieren mentar superhéroes o batalles cósmiques, namás contar una hestoria que se puea ver de manera independiente, ensin perdese n’enguedeyos namás accesibles a los más fans. Esto podría tar rellacionao coles males espectatives que tien The Marvels nos cines, película centrada nel tríu que formen la protagonista de la película Captain Marvel, la de la serie Ms. Marvel y un personaxe secundariu de Wandavision.
Per otru llau, Warner paez siguir la mesma directriz, y agora presenta la serie de The Penguin, pondera de la última película de Batman, como una hestoria mui distinta en tonu a otres franquicies comiqueres. El CEO d’HBO, Casey Bloys, acaba de facer la siguiente afirmación: “Pienso que la clave, mesmamente dientro de DC, ye tratar de contar hestories distintes con distintos estilos, nun intentar facer el mesmu programa una y otra vegada. Yo diría que Peacemaker ye un programa mui distintu en tonu a The Penguin. Asina, nun hai uniformidá na narración y pienso qu’eso ayuda”.
Y, d’esta manera, les series vinientes, masque protagonizaes por superheroínes y supervillanos, tán vendiéndose como si nun lo fueren. ¿Nun ye esto un niciu de la cayida del xéneru?
