Anguaño dicir k-pop (el nome que se-y da al pop de Corea del Sur) yá nun suena raro a casi naide: esto amuésalo l’ésitu internacional que tán teniendo grupos como BTS o Blackpink, que yá dieron dellos conciertos n’Europa, agotando les entraes munchu tiempu enantes. Pero la realidá ye qu’estos grupos nun fueron el primer representante del k-pop perconocíu a nivel mundial, el primer boom mundial d’esta mena de música foi años enantes, nel añu 2012, con un nome y un baile entá perconocíu y imitáu: Oppa Gangnam Style, interpretada pol artista PSY. Pero, ¿qué foi de PSY dempués de talu ésitu? Güei vamos falar d’él.
El Gangnam Style
Un 15 de xunetu de 2012 asoléyase en Corea del Sur la canción Gangnam Style (más mundialmente conocida como la so frase principal Oppa Gangnam Style) qu’algama’l primer puestu musical en Corea del Sur namái salir, pero del que nun s’esperaba tantísima proyeición internacional. Bien ceo, la canción sal de les llendes surcoreanes y entama a escuchase en toles radios y en munchos países, algamando tamién nellos los primeros puestos nes llistes musicales, y al empar, y a nivel mundial, esguilando posiciones nos vídeos más vistos de Youtube. Ye talu l’ésitu, que dellos años foi’l videu más reproducíu de la historia de Youtube (superáu años dempués otres canciones como Baby Shark o Despacito), y foi’l primer videu n’algamar más de 1000 millones de visites.
Nel vídeu apaecen dellos actores y personaxes conocíos de Corea, y tamién como baillarina acompañante la cantante Hyuna. Ta grabáu en dellos llugares conocíos de Corea, y non solo del barriu de Gangnam y ye en parte una crítica a lo que-yos presta aparentar nesi barriu.
El baile de la canción foi imitáu en tolos llugares del mundu, y apaez incluyíu en dellos personaxes de videoxuegos como nel League of Legends o’l Fornite. El cantante llegó a actuar delantre de Barack Obama nel Festival de Navidá de Washington.
¿Quién ye PSY?
PSY ye un cantante, compositor y productor de Corea del Sur. Enantes del Gangnam Style yá sacara dellos álbumes musicales y yá yera conocíu ellí enantes de 2012. Dempués de Gangnam Style sacó más canciones, non tan esitoses, pero tamos falando de unes cifres pergrandes, como por exemplu, 1393 millones de reproducciones con Gentleman o 238 millones de reproducciones en New Face. Hai que lo tener en cuenta, porque les cifres nes que se mueven los sos vídeos nun son les normales y son mui superiores a les de munchos cantantes perconocíos.
Nun hai qu’escaecer la so faceta como productor musical, na que más ta enfotáu agora y de la que nun para de collechar bonos resultaos. Aparte de ser productor de dellos artistes en collaboración con otres compañíes (trabayó con YG Entertainment), en 2019 funda P-Nation, la so propia compañía d’entretenimientu, que s’ocupa d’artistes como Jessie, Crush o la que lu acompañara como bailarina nel so exitazu, Hyuna.
Amás, ye una persona bastante activa y entretenía nes res sociales, y nun ye raro velu demostrar como conoz delles coreografíes de collacios que tamién son artistes a la perfección.
PSY y el k-pop
L’ésitu de PSY foi atípicu, non solo por esparder y dar a conocer pa munches per primer vez el k-pop fuera de Corea del Sur de forma viral (nun podemos escaecer que dellos grupos como Bigbang, Super junior o Wonder Girls), sinón porque nun tien el perfil típicu de los artistes d’esti xéneru. PSY rompió una norma que paez bastante xeneral nesti xéneru de mozos y moces entrenaos dende adolescentes en cantu, baile, con figures delgaes y con rostros afayadizos y consideraos polos cánones coreanos “guapos”. Amás d’esto, ye un cantante solista, cuando los más conocíos suelen ser grupos de mozos o moces. Magar el so éxitu, anguaño ye perclaro qu’esi otru canon ye’l que manda, y tovía queda muncho por percorrer, pero lo que nun se pue negar ye l’ésitu ablucante y tol talentu que nos tien qu’enseñar el k-pop, que vien pa quedase.
