La fuelga de guionistes, a la que más tarde s’unieron actores, ta teniendo yá unes cuantes víctimes y nun tenemos idea d’hasta cuándo. Una mui sonada de la que ficimos ecu equí foi’l remake en forma de serie de Metropolis, el clásicu del ficción científica alemán. Yera un proyeutu mui costosu, y nun ye que lu pararen, ye que con tantu enguedeyu quedó pa prau. Güei tenemos otra película parada y de la que pue danos bastante mieu que nun vuelvan a arrancar nunca, y esta ye la tercer parte de la saga Tron, Tron: Ares.
Con una primer película estrenada ensin munchu ésitu en 1982, pero qu’años depués se convirtió en película de cultu, hubo qu’esperar hasta 2010 pa que saliera la segunda parte, Tron: Legacy. Tantu tuempu tenía pasao que, como indica’l títulu, Jeff Bridges, protagonista de l’anterior, apaecía pa pasr el relevu a actores nuevos, Garret Hedlund y Olivia Wilde. Anque foi una película bastante cara, recaldó tamién una cantidá importante. Pero les crítiques fueron desiguales, y la tercer parte foi atrasándose y atrasándose a cayer nel escaezu. Por embargu, va unos meses pudimos saber que por fin taba de camín Tron: Ares, yá con otru cambiu de repartu que daría tol protagonismu a Jared Leto. Bono, saber lo que ye saber non… Pensábemoslo.
Y ye qu’agora la fuelga fai paralizar la producción “de manera indefinida”, lo que conlleva amás el despidu d’un montonáu de personal (cuenten que más de cientu cincuenta trabayadores). A pesar de la frustración, el direutor Joachim Rønning posicionóse a favor de los guionistes y actores, publicando en redes declaraciones como esta:
“Munchos de los meyores amigos que tengo son escritores. Too comienza cola hestoria. Too comienza con vosotros. Eso ha continuar. Y eso significa que la IA ha regulase. Nun hai dulda sobre l’amenaza que representa la teunoloxía para tolos creativos.“
Recordamos qu’una de les grandes reivindicaciones de la fuelga ye impidir l’usu d’intelixencies artificiales pa sustituyir a los guionistes (y pueque dientro de non muncho tamién a los actores). Nun podemos dexar de notar lo paradóxico de qu’esto afeute a Tron, siendo como ye una saga sobre los peligros de la intelixencia artificial.
