Foi ayeri mesmo que la productora de videoxuegos EA anunció la creación d’un estudiu nuevu, Cliffhanger Games, al que tresllada trabayadores con esperiencia nos xuegos de Middle-earth, God of War, Halo o Call of Duty. El so primer llabor ye llevar un superhéroe nuevu de Marvel a manes de los xugadores, cosa que paez mui llamadera dende l’ésitu del Spider-Man d’Insomniac de 2018. De fechu, a puntu ta de salir la segunda parte d’esti, y la mesma compaña ta trabayando nún de Wolverine.
¿Y cuál ye’l personaxe del que va encargase esti estudiu nuevu? Pos, la verdá, nun ye de los más conocíos, pero de xuru que pelo menos vos suena porque yá tien salío nunes cuantes películes. Esti ye Black Panther, el primer superhéroe africanu de Marvel. Y, si nun vos suena, contavos que ye’l rei d’un pequeñu país ficticiu, Wakanda, que gracies a la esistencia d’un metal único nel mundu y de propiedaes estraordinaries pudieron caltener la independencia de toles potencies estranxeres, y agora entemez ciencia-ficción y tradiciones africanes d’un mou increyible. El rei, per otru llau, ha comer como ritual unes yerbes rares que crecen en tierres riques nel mineral, y que-y dan superpoderes del tótem wakandianu, la Pantera Negra.
El supervisor del xuegu, Kevin Stephens (tamién responsable de los Middle-earth) diz que Wakanda ye una sandbox tremenda, y que busquen crear un mundu épicu enllenu d’esploración, amás de dar una narrativa potente na que los xugadores puean tener más capacidá d’eleición de la que nunca se tuvo nun xuegu con historia llinial. Ye de suponer, entós, que tamién vamos tener de tomar decisiones como gobernante qu’afeuten a tol reinu.
Poco más se sabe del xuegu. De los demás que vos contábemos, Marvel’s Spider-Man 2 y Marvel’s Wolverine, si tenéis interés podéis ver los avances calcando equí y equí, respeutivamente (anque del segundu namás hai cinemática).
Black Panther ye un superhéroe creáu por Stan Lee y Jack Kirby qu’apaeció la primer vegada en Fantastic Four #52 (1966) pero unes cuantes persones tienen señalao’l so asemeyu con Lion-Man, héroe creáu en 1947 por Geo J. Evans Jr. p’All-Negro Comics, primer revista d’historietes por y pa públicu afroamericanu.
