Como con cuasi tolos personaxes de dominiu públicu, los universos comiqueros ficieron propiu’l famosu personaxe navidiegu, caún coles sos particularidaes. ¿Cuáles? Sigui lleendo, porque vamos velo darréu.
DC:
El verdaderu San Nicolás morrió, y John Constantine surnió polvu de los sos güesos como si fora cocaína pa facer un ritual (¡Blanca Navidá!). Por embargu, la so esencia inmortal paez esistir daveres nel universu DC, pelo menos nel mundu oníricu. Sandman (el de Jack Kirby, non el de Neil Gaiman) salvólu de los Homes Foca, y Superman recibió un xuguete kryptonianu tres d’ayudalu en suaños.
Per otru llau, Lobo, un cazarrecompenses estraterrestre, enfrentóse a un tal Kris Kringle, un dictador del Polu Norte igualín a Pá Noel y con un exércitu d’elfos al so serviciu. Tamién hai un tal Ni’Klaus de Myra, un magu poderosu al que Black Adam foi a pidir esplicaciones por nun dar nunca regalos a los neños del so país.
Marvel
Les lleendes de San Nicolás, Odín y Old Man Winter xuniéronse nel imaxinariu coleutivu, dando llugar al poderosu mutante místicu que ye Pá Noel. Los sos elfos y renos voladores, pela cueta, provienen direutamente d’Asgard. Na so xera tiense alcontrao con abondos metahumanos, como cuando lu secuestró Hitler y tuvo de salvalu’l Capitán América, cuando los X-Men quixeron reclutalu, cuando usó les sos habilidaes como detective y conoció a She-Hulk, o cuando contrataron a Deadpool pa matalu.
Otros:
En The League of Extraordinary Gentlemen d’Alan Moore y Kevin O’Neill (obra de la que vos falemos equí), Pá Noel ye un poderosu xamán que viste pelleyos de renu al aviesu (d’ehí el coloráu). En Klaus, de Grant Morrison y Dan Mora, ye un superhéroe que da regalos a los neños como una manera de rebelase escontra un réxime absolutista. Y en Santa the Barbarian, del polémicu Rob Liefeld, ye un selvaxe hipermusculáu que mata a espadazos a cuasi tol que se-y crucia per delantre.
Y anque podríemos pasanos toles Navidaes falando d’otres versiones, estes paecen más que suficientes pa fartar. Porque güei, suponemos, que tamién vais tener ocupaos colos regalos que vos traxeren. Recordái ser bonos pal añu qu’entra, nun seya que Pá Noel se vengue.
¡Felices Navidaes!
