La llegada de “La Naranxa Mecánica” a les llibreríes d’Asturies nun foi namás un descubrir la traducción d’esta novela mítica pa muncha xente, sinón, tamién el descubrir que munches veces tres de les películes más emblemátiques que conocemos escuéndense obres lliteraries d’importancia.

Polo xeneral, suel pasar con obres qu’algamen un grau de reconocimientu importante na so versión cinematográfica pero que nun tienen un éxitu igual na so versión lliteraria. Películes premiaes como la triloxía d’El Señor de los Aniellos o obres maestres como Dracula, nun faen inorar a la gran mayoría de la población que tán basaes nuna obra lliteraria. Sicasí, en delles ocasiones ún sorpréndese al saber que tres de tala o cuala película había una novela. En Refuelgu quiximos facer un “ranking” pequeñín de les películes más importantes que, polo xeneral, nun sabemos que tán basaes nun llibru:

La Naranxa Mecánica

Naranxa mecánica - Anthony Burgess - comprar libro 9788418286216 - Cervantes

La Naranxa Mecánica ye una de les obres más conocíes de Stanley Kubrick como direutor de cine. Ye xustamente esta adautación la que-y dio la fama a una obra d’un autor que ta acabante de pisar l’escaparate de les llibreríes d’Asturies cola adautación de José Luis Piquero y Ediciones Trabe.

Die Hard

Die Hard, o como se tornó al castellán nos cines d’España “La Jungla de Cristal” foi llibru primero de ser película. El llibru, que nun se llamaba igual que la película “Nada ye pa siempre”, de Roderick Throp ye muncho menos conocíu que la que ta considara como un clásicu del cine d’aición.

Shrek

A Shrek tampoco foi’l cine’l que lu fixo. Primero de toes eses películes, sagues y adautaciones, Shrek yera un ogru mui feu – igual de feu que nes películes – que salvaba por accidente a una princesa nun cuentu infantil ilustráu. La película de Shrek acabó siendo la primera en ganar un premiu d’animación de l’academia del cine americanu (Oscar)

Forrest Gump

Forrest Gump ye otru personaxe icónicu del cine de les últimes décades y una de les poques cintes que ponen la discapacidá inteleutual nel focu y contribuyen a normalizar una visión ensin prexuicios d’ella. Con too, la película taba basada nel llibru homónimu de Winston Groom. L’ésitu de la película foi talu (en comparanza col de la novela) que l’autor decidió crear una segunda parte de Forrest Gump depués.

Goodfellas

Goodfellas ye, ensin dulda, una de les meyores películes de gangster que se fixeren nunca y esta obra de Scorsese ta en tolos podios del cine: Dende Filmaffinity hasta IMDB. Con too, primero de ser película Goodfellas foi un llibru, anque nun tuvo esi nome. El llibru de Nicholas Pileggi llamábase “Wise Guy” y dicimos llibru y non novela adréi: Nun se trata d’un trabayu novelísticu o lliterariu, sinón d’un reportaxe periodísticu bien completu sobre’l mundu de los gángster americanos y, n’especial, sobre Henry Hill, un mafiosu qu’acabó convirtiéndose n’informante de la policía.

Mrs. Doubtfire

Mrs. Doubtfire (Doña Doubtife) ye una comedia de les más mítiques que se recuerden y quiciabes la película onde más rellumaron les artes interpretatives del so protagonista, Robin Williams. Pero lo de ser novela primero de película nun ye cuestión esclusiva de los drames, y pasa lo mesmo con “Madame Doubtfire”, la novela d’Anne Fine trata’l tema del divorciu con humor, anque pa los estándares éticos de 2020 pudiere ser bastante problemática.

Howl’s Moving Castle

Howl’s Moving Castle, tornáu al castellán como “El castillo ambulante”, ye ún de los trabayos más importantes de Studio Ghibli y Hayao Miyazaki. Primero de ser película, el Castiellu yera un llibru de la escitora de fantasía pa neños Diana Wynne Jones. Coméntase qu’a l’autora prestó-y el trabayu final, anque nun tuvo nada que ver nin col rodaxe nin col guión de la película.

¿Y tu? ¿Yes a dicir dalguna película icónica que mui poques persones saben que yera nun entamu un llibru?

Leave a Reply

La to direición de corréu nun va espublizase. Los campos riquíos márquense con *