Ye vezu ente los streamers grabase xugando a videoxuegos. De fechu, ye la manera como se ficieron famosos munchos d’ellos. Por embargu, el “xéneru” d’estos direutos paez alcontrase énte dellos problemes llegales, pos al cabu y al cantu tán usando conteníu creáu por otros; esto ye, claro, el videoxuegu en sí mesmu.
Les compañes, hasta agora, tienen dexao que pase, pos tamién ye de dalguna manera publicidá pa ellos. La cosa complícase, sicasí, cuando los streamers muestren énte miles de persones coses que s’espera que sorpriendan al xugador, porque ye como poner la final d’una película na que se descubre quién ye l’asesín. ¿Perxudica esto a la obra? En Xapón piensen que sí.
A Yoshida Shinobu, un streamer xaponés, detuviéronlu d’esta manera por vulneración de drechos d’autor, depués de que delles productores de videoxuegos lu denunciaren por desvelar partes importantes de los argumentos (incluyendo les finales). Énte estos videoxuegos perxudicaos polos spoilers alcuéntrase’l nomáu Steins; Gate: My Darling’s Embrace. Yoshida reconoció saber que ye illegal reproducir imáxenes con drechos d’autor, y la fiscalía considera qu’ello desmotiva a comprar el xuegu. Ye por esto que pide nada menos qu’una pena de dos años de cárcel y una multa d’un millón de yenes (como seis mil cuatrocientos euros). Pronto, probablemente mañana, van dictar un veredictu, y esti va ser determinante pa lo qu’ocurra a partir d’agora ente los streamers xaponeses. El debate ta abiertu nel País del Sol Naciente, y quiciabes ye namás cuestión de tiempu que tamién llegue acá.
Conque, si vos dedicáis a estes coses, yá seya profesionalmente o pasar el ratu… tenéi procuru colo que facéis.
