N’otros artículos yá vos faláramos de Nintendo, y de los sos planes de siguir espandiendo l’universu de Pokémon con remakes de xuegos más vieyos, pero tamién con anovaciones nel tipu de xuegos. Sabemos que ta planiao sacar un xuegu de mundu abiertu col títulu Lleendes de Pokémon: Arceus. Pero enantes d’esto Nintendo ta acabante de dar otru pasu y va menos d’un mes asoleyó Pokémon Unite, un xuegu en llinia por equipos que yá tien una montonera de xugadores, y qu’amás, ye de baldre (pues meter perres pa mercar más pokémon, oxetos y aspeutos especiales pa los tos pokémon, pero nun ye obligatorio). De momentu, el xuegu ta disponible solo pa Nintendo Switch, sicasí, en setiembre tamién va poder xugase nos móviles, polo que’l requisitu de tener la consola nipona pa poder xugalu va desapaecer.

Pokémon Unite ye, como tamos acabante de dicir, un xuegu en llinia, de los etiquetaos como xuegu multixugador d’arena de batalla en llinia (pa que m’entendáis, como’l League of Legends, Smite, Heroes of the Storm…). Esti xuegu tien tres moos de xuegu: standard (partíes de 10 minutos), quick (o lo que ye lo mesmo, partía rápida de 5 minutos) o ranked (partíes de 10 minutos que si ganes o pierdas van colocándote nuna clasificación a nivel mundial). La duración d’estes partíes ye invariable.

Lo qu’hai que facer nel xuegu ye abondo fácil: subir de nivel lluchando colos pokémon que tán pel mapa y de los rivales, algamar pokéball d’esos enfrentamientos y encestales nes canastes del equipu contrariu. Entames nuna base (que tien delantre una canasta) nuna punta del mapa y los rivales na otra, y tienes que dir acercándote y destruyendo les canastes rivales hasta averate hasta la que ta delantre de la so base (qu’amás da más puntos). Si dalgún de los rivales te vence, apaeces nunos segundos na base otra vez, pero güeyu, porque va quedase coles pokéball qu’algamaras hasta que te venciera. Hai dellos pokémon qu’apaecen nel mapa y que si los vences algames ventaya, ente los que’l más importante ye Zapdos, qu’apaez a lo cabero de les partíes, y que pue suponer la diferencia ente ganar y perder.

Nel xuegu hai dos carriles o llinies (una superior y una inferior) y lo que se conoz nesti tipu xuegos como “xungla” (una zona que ta pel medio les llinies y nes qu’un de los xugadores tien que dir algamando puntos y ayudando a los compañeros que van por llinia).

Nel xuegu hai distintos roles: ofensivos, defensivos, áxiles, apoyos y equilibraos, que van desendolcar distintos papeles na partía. Dependiendo del tipu de partía va haber de 3 a 5 xugadores en caún de los equipos. Nun hai qu’escaecer que ye un xuegu n’equipu y qu’hai que cooperar colos compañeros pa consiguir ganar la partía. Dalgunos de los pokémon que podéis atopar son Pikachu, Venusaur, Absol, Charizard, Lucario, Snorlax…nos casos como Venusaur, que ye una evolución, entames cola primer forma y vas evolucionando al subir de nivel.

El xuegu tien chat con mensaxes prefixaos, ye dicir, pues escoyer ente mandar dellos mensaxes talos como la llinia que quies o prefieres xugar o pidir una gabita, pero nun puedes escribir lo que quieras. Esto fai que’l xuegu seya munchu más seguru y que refugue de situaciones d’acosu. Nun hai qu’escaecer que ye habitual atopar neños y neñes xugando cola Nintendo Switch, y que tean protexíos de los otros usuarios ye perimportante.

Tamién se tán faciendo dellos torneos onde se puen inscribir los xugadores del xuegu y algamar dellos premios si queden ente los primeros: d’entamu los premios yeren recompenses pa usar dientro del xuegu, pero nun hai que s’estrañar de que más p’alantre haya premios monetarios.

Pa finar, y volviendo al tema de les ranked, tenemos que dicir que hai xugadores que lleven entrenando desque s’asoleyó’l xuegu, y tenemos a lo menos tres xugadores y streamers españoles ente los 25 primeros na clasificación mundial: Knekro, Ernesbarbeq y ReventXz.

Leave a Reply

La to direición de corréu nun va espublizase. Los campos riquíos márquense con *