Namás que Disney anunció l’adautación a aición real que diba facer de Blancañeves y los siete nanos, l’actor Peter Dinklage (Tyrion Lannister en Game of Thrones) criticó duro a la productora. Paecía-y raro, dixo, que Disney s’enchipara de contratar una actriz llatinoamericana pal papel de la protagonista mientres caltenía aquello de “y los siete nanos“. Considerábalo anacrónico, y pidía a la compaña que lo repensara. A ello, Disney respondió que se comprometíen a crear un elencu diversu y ensin estereotipos, y de fechu quitaron esa parte del títulu. Apocayá salió una imaxe del rodaxe de la película, y vese que de los qu’agora son “les siete creatures máxiques”, d’etnies y xéneros diversos, namás ún carez nanismu.
Podía ser que l’alderique quedara neso, una discusión como toes les que se dan los últimos años sobre lo woke y lo políticamente correuto. Por embargu, unes declaraciones nueves dan agora la vuelta a la tortiella y faen pensar que quiciabes ta falándose, non yá d’aquello que más o menos acertao llamase “inclusión forciada”, sinón más bien d’una esclusión polos mesmos motivos políticos. Y ye que’l lluchador de WWE Dylan “Hornswoggle” Postl, tamién nanu, culpa agora a Dinklage de facer qu’otros actores cola so condición nun protagonicen la película:
“Hai actores, actores nanos, que viven esi suañu de tar nuna gran película como esta versión nueva de Disney, y agora, polo que Peter Dinklage dixo l’añu pasáu, agora quíten-yoslo, pol “progresismu” Yo nun pueo optar a los papeles de Harrison Ford o George Clooney porque nun son para min. Estos papeles de nanos son pa xente del mio altor, y agora quítenmelos. A min nun me paez bien, y non solo eso, sinón qu’agora piensa nos especialistes o los dobles, yá tas falando d’unos cuantos actores del mio altor que nun consiguen estos papeles principales. Toos esos naninos cuidaron de Blancañeves. Nun yeren esos monstruos cavernícoles de los que fala la xente. Toos tenían una de siete característiques distintes pa siete actores distintos de la mio comunidá.“
Asina, la cosa paez abondo más complicada. Y vós, ¿qué pensáis?
