Como parte del attrezzo pa la tercer parte de Rocky, Stallone mandó facer una estatua, nada menos que de bronce, del boxeador protagonista (interpretáu por él) Rocky Balboa. La estatua taba tan bien fecha qu’al final quedó na ciudá de Filadelfia, afincando nel so sitiu definitivu en 2006, con pedestal y too, bien cerca de les paseres peles que’l personaxe xubía entrenando al son d’Eye of the Tiger. Anguaño, según cuenten, ye ún de los puntos turísticos más visitaos de la ciudá.
La polémica, por supuestu, siempre tuvo ehí con ella. Per un llau, porque se pon una estatua a un boxeador de ficción cuando non (davezu) a los verdaderos. Porque ye blancu cuando cuasi tolos históricos del país son afroamericanos… Hasta hai quien diz que la estatua maldiz a los Philadelphia Eagles, l’equipu de fútbol americanu asentáu na ciudá.
Agora, por embargu, ye Mike Tyson el que revilva la polémica, pos nunes declaraciones nueves comenta que nun ta nada contentu cola situación. Y ye que resulta que’l que, mui probablemente, ye’l boxeador más famosu del mundu, tien como un ídolu al que foi’l verdaderu gran boxeador de Filadelfia, Joe Frazier (1944-2011). Frazier, Smokin’ Joe, yera un afroamericanu humilde que llegó de rapaz a la ciudá pa empezar trabayando como ayudante de carnicería, pero acabó convirtiéndose en campeón mundial de pesu pesáu, ganó la medaya d’oru nos Xuegos Olímpicos de Tokio de 1964 y foi un rival dignu del más popular Muhammad Ali, al que llogró vencer nel llamáu “Combate del Sieglu”. Tyson piensa que la ciudá nun reconoció a Frazier como hubiera de facelo, y que tengan ehí puesta una estatua d’un personaxe de ficción en cuenta de la d’él ye, direutamente, un insultu a la so memoria.
La verdá ye que la sobresaturación de producción cultural, y que nos llegue cuasi too en formatu audiovisual, paez desdibuxar les llinies ente realidá y ficción, pos too se convierte nun espectáculu más. ¿Qué diferencia cómo vemos nes noticies y tertulies l’intentu de golpe d’Estáu en Rusia con una hestoria de Tom Clancy? Pueque ello nos lleve, como apunta Tyson, a dexar d’atender a los héroes y los fechos reales pa somorguianos nun océanu d’imáxenes, onde nun importa qué ye real sinón, a cencielles, qué hestoria nos presta más.
