La serie Black Mirror, que revolucionó la televisión como una antoloxía smartpunk, quedó nun llimbu col andanciu y los estaos d’emerxencia del que paecía bien difícil salir. El mesmu creador de la serie, Charlton Brooker, llegó a dicir que “nun sé si habría estómagu pa hestories sobre sociedaes qu’esbarrumben, conque nun toi trabayando nelles”, sinón que taba escribiendo comedia.
Por suerte, agora qu’aquellos tiempos paecen quedar lloñe, por fin vamos tener de vuelta la serie cola estrena en Netflix el día quince d’esti mesmu mes. Y amás, a lo grande, porque anque yá tenemos visto en dalgún episodiu a estrelles de Hollywood, como Miley Cyrus o Anthony Mackie, agora empieza a ser vezu, y nos cinco episodios de los que se compón esta temporada hai actores como Salma Hayek, Aaron Paul, Josh Hartnett o Kate Mara. L’ésitu de l’a serie’antoloxía conviértela en cuasi una institución, y abulta que los actores quieren apaecer nella más pola prestancia que poles perres.
La serie estrenóse en 2011 con aquel episodiu que causó tantu revuelu, The National Anthem, nel qu’unos terroristes secuestren a una moza que pertenez a la familia real británica y amenacen con matala si’l primer ministru nun tien rellaciones con un gochu en direuto per televisión. Y,anque esi episodiu tenía un argumentu especialmente ordinariu, l’antoloxía trata en caún un aspeutu de les posibilidaes siniestres a les que nos puen llevar les nueves teunoloxíes nun futuru bien cercanu: la realidá virtual y aumentada, les redes sociales, la intelixencia artificial o’l transhumanismu. D’ehí’l nome (“black mirror” ye como se llama’l cristal de los teléfonos, amás d’un “espeyu escuru” nel qu’ún se reflexa) y que se llegue a denomar el xéneru como smartpunk, de la mesma manera como les hestories de ficción científica distópica de va unes décades yeren cyberpunk. Amás, anque los episodios nun siguen siquiera un orde temporal y nun repiten protagonistes, si tienen coneutao adulces unos con otros, con detallinos, pa que se decaten los más aficionaos y hasta permitiendo facer una cronoloxía de cómo va torciéndose’l mundu.
Yá tenemos los cartelos de los cinco episodios, que vos dexamos darréu, amás como un avance recién de la temporada que vos dexamos calcando equí.
